৷৷ ৷৷

৷৷ শ্রীমদ্বাল্মীকীযরামাযণম্ ৷৷

৷৷ বালকাণ্ডঃ ৷৷

৷৷ শ্রীসীতালক্ষ্মণহনুমত্সমেতশ্রীরামচন্দ্রপরব্রহ্মণে নমঃ ৷৷

৷৷ শ্লোকসহিতব্যাখ্যানম্ ৷৷

শ্রীমতে রামানুজায নমঃ ৷৷ আচার্যং শঠকোপদেশিকমথ প্রাচার্যপারম্পরীং শ্রীমল্লক্ষ্মণযোগিবর্য্যযমুনাবাস্তব্যনাথাদিকান্ ৷ বাল্মীকিং সহ নারদেন মুনিনা বাগ্দেবতাবল্লভং সীতালক্ষ্মণবাযুসূনুসহিতং শ্রীরামচন্দ্রং ভজে ৷৷ 1 ৷৷

শ্রীমত্যঞ্জনভূধরস্য শিখরে শ্রীমারুতেঃ সন্নিধাবগ্রে বেঙ্কটনাযকস্য সদনদ্বারে যতিক্ষ্মাভৃতঃ ৷ নানাদেশসমাগতৈর্বুধগণৈ রামাযণব্যাক্রিযাং বিস্তীর্ণাং রচযেতি সাদরমহং স্বপ্নে স্মি সঞ্চোদিতঃ ৷৷ 2 ৷৷

ক্বাহং মন্দমতির্গভীরহৃদযং রামাযণং তত্ক্ব চ ব্যাখ্যানে স্য পরিভ্রমন্নহমহো হাসাস্পদং ধীমতাম্ ৷ কো ভারো ত্র মম স্বযং কুলগুরুঃ কোদণ্ডপাণিঃ কৃপাকূপারো রচযত্যদঃ সপদি মজ্জিহ্বাগ্রসিংহাসনঃ ৷৷ 3 ৷৷

বৈযর্থ্যং পুনরুক্ততামনুচিতারম্ভং বিরোধং মিথো সাধুত্বং চ পদপ্রবন্ধরচনাবাক্যেষু নিঃশেষযন্ ৷ স্বারস্যং চ পদে পদে প্রকটযন্ রামাযণস্য স্বযং ব্যাখ্যামেষ তনোতি সজ্জনমুদে গোবিন্দরাজাহ্বযঃ ৷৷ 4 ৷৷

পূর্বাচার্য্যকৃতপ্রবন্ধজলধেস্তাত্পর্যরত্নাবলীর্গ্রাহং গ্রাহমহং শঠারিগুরুণা সন্দর্শিতেনাধ্বনা ৷ অন্যব্যাকৃতিজাতরূপশকলৈরাযোজ্য সজ্জীকৃতৈঃ শ্রীরামাযণভূষণং বিরচযে পশ্যন্তু নির্মত্সরাঃ ৷৷ 5 ৷৷

সুস্পষ্টমষ্টাদশকৃত্য এত্য শ্রীশৈলপূর্ণাদ্যতিশেখরো যম্ ৷ শুশ্রাব রামাযণসম্প্রদাযং বক্ষ্যে তমাচার্যপরম্পরাত্তম্ ৷৷ 6 ৷৷

ক্বচিত্ পদার্থং ক্বচিদন্বযার্থং ক্বচিত্পদচ্ছেদসমর্থনানি ৷ ক্বচিত্ক্বচিদ্গাঢনিগূঢভাবং বক্ষ্যে যথাপেক্ষমবেক্ষণীযম্ ৷৷ 7 ৷৷

অবতারিকা- শ্রিযঃপতিরবাপ্তসমস্তকামঃ সমস্তকল্যাণগুণাত্মকঃ সর্বেশ্বরঃ "বৈকুণ্ঠে তু পরে লোকে শ্রিযা সার্দ্ধং জগত্পতিঃ ৷ আস্তে বিষ্ণুরচিন্ত্যাত্মা ভক্তৈর্ভাগবতৈঃ সহ ৷৷" ইত্যুক্তরীত্যা শ্রীবৈকুণ্ঠাখ্যে দিব্যলোকে শ্রীমহামণিমণ্ডপে শ্রীভূমিনীলাভিঃ সহ রত্নসিংহাসনমধ্যাসীনো নিত্যৈর্মুক্তৈশ্চ নিরন্তরপরিচর্যমাণচরণনলিনোপি তদ্বদেব স্বচরণযুগলপরিচরণার্হানপি তদ্ধীনান্ প্রলযে প্রকৃতিবিলীনান্ মধূচ্ছিষ্টমগ্নহেমকণসদৃক্ষান্ ক্ষীণজ্ঞানান্ জীবানবলোক্য "এবং সংসৃতিচক্রস্থে ভ্রাম্যমাণে স্বকর্মভিঃ৷ জীবে দুঃখাকুলে বিষ্ণোঃ কৃপা কাপ্যুপজাযতে ৷৷" ইত্যুক্তরীত্যা দযমানমনাঃ "বিচিত্রা দেহসম্পত্তিরীশ্বরায নিবেদিতুম্ ৷ পূর্বমেব কৃতা ব্রহ্মন্ হস্তপাদাদিসংযুতা ৷৷" ইত্যুক্তপ্রকারেণ মহদাদিসৃষ্টিক্রমেণ তেষাং স্বচরণকমলসমাশ্রযণোচিতানি করণকলেবরাণি দত্ত্বা নদীতরণায দত্তৈঃ প্লবৈর্নদীরযানুসারেণ সাগরমবগাহমানেষ্বিব তেষু তৈর্বিষযান্তরপ্রবণেষু তেষাং সদসদ্বিবেচনায 'শাসনাচ্ছাস্ত্রম্' ইত্যুক্তরীত্যা স্বশাসনরূপং বেদাখ্যং শাস্ত্রং প্রবর্ত্যাপি তস্মিন্নপ্রতিপত্তিবিপ্রতিপত্ত্যন্যথাপ্রতিপত্তিভিস্তৈরনাদৃতে স্বশাসনাতিলঙ্ঘিনং জনপদং স্বযমেব সাধযিতুমভিযিযাসুরিব বসুধাধিপতিঃ স্বাচারমুখেন তান্ শিক্ষযিতুং রামাদিরূপেণ চতুর্দ্ধাবতিতীর্ষুরন্তরামরগণৈঃ সদ্রুহিণৈরভ্যর্থিতঃ স্বারাধকস্য দশরথস্য মনোরথমপি পূরযিতুং

চতুর্দ্ধাবততার ৷ তত্র রামরূপেণাবতীর্য রাবণং নিহত্য পিতৃবচনপরিপালনাদিসামান্য ধর্মমন্বতিষ্ঠত্, লক্ষ্মণরূপেণ রাবণিং নিরস্য ভগবচ্ছেষত্বরূপং বিশেষধর্মম্, ভরতরূপেণ গন্ধর্বান্নির্বাস্য ভগবত্পারতন্ত্র্যরূপম্, শত্রুঘ্নরূপেণ লবণাসুরং ধ্বংসযিত্বা ভাগবতশেষত্বম্ ৷ তানিমান্ ধর্মান্ তানীমানি চাপদানানি তত্কালমাত্রপর্যবসিতানি ভবিষ্যন্তীতি মন্বানঃ সর্বলোকহিতপরঃ পিতামহো ভগবান্ ব্রহ্মা রামচরিত্রপবিত্রিতং শতকোটিপ্রবিস্তরং প্রবন্ধং নির্মায তং নারদাদীনধ্যাপ্য ভূলোকে পি সন্ততরামমন্ত্রানুসন্ধানসন্ধুক্ষিতহৃদযবাল্মীকিমুখেন সঙ্গ্রহেণ প্রবর্ত্তযিতুং নারদং প্রেষযামাস ৷ তদুক্তং মাত্স্যে- "বাল্মীকিনা চ যত্প্রোক্তং রামোপাখ্যানমুত্তমম্ ৷ ব্রহ্মণা চোদিতং তচ্চ শতকোটিপ্রবিস্তরম্ ৷ আহৃত্য নারদেনৈব বাল্মীকায নিবেদিতম্ ৷৷" ইতি৷ বাল্মীকিরপি নিখিলবেদান্তবিদিতপরতত্ত্বনির্দিধারযিষযা যদৃচ্ছযোপগতং নারদং পৃষ্ট্বাবগতপরতত্ত্বস্বরূপঃ তদনু প্রসন্নেন বিধিনা দত্তসকলসাক্ষাত্কারপ্রবন্ধনির্মাণশক্তির্বেদোপবৃংহণমারভমাণঃ তস্যার্থপ্রধানসুহৃত্সম্মিতেতিহাসতাং ব্যঙ্গ্যপ্রধানকান্তাসম্মিতকাব্যতাং চ পুরস্কুর্বন্ "কাব্যালাপাংশ্চ বর্জযেত্" ইতি নিষেধস্যাসত্কাব্যবিষযতাং চ নির্ধারযন্ স্বগ্রন্থে প্রেক্ষাবতাং প্রবৃত্ত্যর্থং তদঙ্গানি দর্শযতি প্রথমতশ্চতুঃসর্গ্যা৷ তত্র প্রথমসর্গেণ বিষযপ্রযোজনে দর্শযতি৷ তত্র চ "তদ্বিদ্ধি প্রণিপাতেন পরিপ্রশ্নেন সেবযা" ইতি বেদান্তরহস্যস্য প্রশ্নপূর্বকং জ্ঞেযত্ববিধানাত্ "নাপৃষ্টঃ কস্যচিদ্ব্রূযাত্" ইত্যপৃষ্টোত্তরস্য প্রত্যাদিষ্টত্বাচ্চ প্রশ্নমাবিষ্করোত্যাদিতঃ পঞ্চশ্লোক্যা ৷৷



তপঃস্বাধ্যাযনিরতং তপস্বী বাগ্বিদাং বরম্ ৷

নারদং পরিপপ্রচ্ছ বাল্মীকির্মুনিপুঙ্গবম্ ৷৷ 1.1.1 ৷৷

অথ প্রারিপ্সিতস্য গ্রন্থস্য নিষ্প্রত্যূহপরিপূরণায প্রচযগমনায চ গুরুনমস্কারং দেবতানমস্কারং চ বিদধাতি- তপস্স্বাধ্যাযেতি ৷ তত্র "আচার্যাদ্ধ্যেব বিদ্যা বিদিতা সাধিষ্ঠং প্রাপত্" "আচার্যবান্ পুরুষো বেদ" ইত্যাদিশ্রুত্যা সদাচার্যোপদেশস্যৈবাতিশযাবহত্বাত্স্বগুরোরাচার্যলক্ষণপূর্তিং দর্শযতি দ্বিতীযান্তপদৈঃ ৷ তত্র বেদসম্পন্নত্বমাহ তপঃস্বাধ্যাযনিরতমিতি ৷ তপশ্চ স্বাধ্যাযশ্চ তপঃস্বাধ্যাযৌ "অল্পাচ্তরম্" ইতি তপঃশব্দস্য পূর্বনিপাতঃ ৷ তপঃ চান্দ্রাযণাদি, স্বাধ্যাযো বেদঃ ৷ "স্বাধ্যাযো বেদতপসোঃ" ইতি বৈজযন্তী ৷ তযোর্নিরতং নিরন্তরাসক্তম্ ৷ আবশ্যকত্বাদেতদুভযমুক্তম্ ৷ তদাহ মনুঃ- "তপো বিদ্যা চ বিপ্রস্য নিঃশ্রেযসকরং পরম্ ৷ তপসা কল্মষং হন্তি বিদ্যযা জ্ঞানমশ্নুতে" ইতি ৷ যদ্বা তপো জ্ঞানম্ ৷ "তপ আলোচনে" ইত্যস্মাদ্ধাতোরসুন্প্রত্যযঃ ৷ শ্রুতিশ্চাত্র ভবতি "যস্য জ্ঞানমযং তপঃ" ইতি ৷ যোগ ইতি যাবত্ ৷ স্বাধ্যাযো বেদঃ তযোর্নিরতম্ ৷ "স্বাধ্যাযাদ্যোগমাসীত যোগাত্স্বাধ্যাযমাবসেত্ ৷ স্বাধ্যাযযোগসম্পত্ত্যা গমিষ্যতি পরাং গতিম্ ৷৷" ইত্যুক্তপ্রকারেণ সক্তমিত্যর্থঃ৷ যদ্বা তপো বেদঃ, "তপো হি স্বাধ্যাযঃ" ইতি শ্রুতেঃ৷ স্বাধ্যাযো জপঃ৷ "স্বাধ্যাযো বেদজপযোঃ" ইত্যুক্তেঃ৷ তত্র নিরতম্৷ "স্বাধ্যাযান্মা প্রমদঃ৷ বেদমেব জপেন্নিত্যম্" ইত্যুক্তরীত্যা সক্তমিত্যর্থঃ৷ যদ্বা তপো ব্রহ্ম "ব্রহ্মৈতদুপাস্বৈতত্তপঃ" ইতি শ্রুতেঃ৷ তপঃপ্রধানঃ স্বাধ্যাযস্তপঃস্বাধ্যাযঃ৷ শাকপার্থিবাদিত্বান্মধ্যমপদলোপী সমাসঃ৷ বেদান্ত ইতি যাবত্, তত্র নিরতম্৷ "স্বাধ্যাযপ্রবচনাভ্যাং ন প্রমদিতব্যম্" ইত্যুক্তরীত্যাধ্যযনাদিপরমিত্যর্থঃ৷ যদ্বা তপো ব্যাকরণম্৷ তথোক্তং বাক্যপদীযে- "আসন্নং ব্রহ্মণস্তস্য তপসামুত্তমং তপঃ৷ প্রথমং ছন্দসামঙ্গমাহুর্ব্যাকরণং বুধাঃ ৷৷" ইতি, তদিতরেষামঙ্গানামুপলক্ষণম্ ৷ তত্সহিতঃ স্বাধ্যাযঃ তপঃস্বাধ্যাযঃ তত্র নিরতম্, সাঙ্গবেদাধ্যাযিনমিত্যর্থঃ ৷ যদ্বা তপঃ স্বং যস্যাসৌ তপঃস্বঃ, অধ্যাযো বেদঃ "ইঙ্ অধ্যযনে" ইত্যস্মাদ্ধাতোঃ "অধ্যাযন্যায- " ইত্যাদিনা নিপাতনাত্ ৷ অত এব "স্বাধ্যাযো ধ্যেতব্যঃ" ইত্যত্র স্বস্য

অধ্যাযঃ স্বাধ্যাযঃ, স্বশাখেত্যাচার্যৈর্ব্যাখ্যাতম্ ৷ তত্র নিরতো ধ্যাযনিরতঃ ৷ তপঃস্বশ্চাসাবধ্যাযনিরতশ্চ তপঃস্বাধ্যাযনিরতঃ ইতি কর্মধারযঃ, তম্ ৷ যদ্বা তপো ব্রহ্ম, তদ্রূপঃ

স্বাধ্যাযঃ তপঃস্বাধ্যাযঃ তস্মিন্ নিরতম্, সামগানলোলমিত্যর্থঃ ৷ "বেদানাং সামবেদো স্মি" ইতি ভগবতা গীতত্বাত্ ৷ এবং বেদাধ্যযনমুক্তম্ ৷৷

অথ "যদধীতমবিজ্ঞাতং নিগদেনৈব শব্দ্যতে ৷ অনগ্নাবিব শুষ্কৈধো ন তজ্জ্বলতি কর্হিচিত্ ৷৷" ইতি কেবলাধ্যযনস্য নিন্দিতত্বাত্তদর্থজ্ঞত্বমাহ- বাগ্বিদাং বরমিতি৷ বাগ্ বেদঃ৷ "অনাদিনিধনা হ্যেষা বাগুত্সৃষ্টা স্বযম্ভুবা" ইতি বাক্শব্দস্য বেদে প্রযোগাত্৷ তাং বিদন্তি জানন্তীতি বাগ্বিদঃ বেদার্থজ্ঞাঃ তেষাং মধ্যে পরং শ্রেষ্ঠম্৷ নির্দ্ধারণে ষষ্ঠী৷ যদ্বা বাক্ ব্যাকরণম্৷ "যশ্চ ব্যাকুরুতে বাচম্৷ বাগ্যোগবিদ্দুষ্যতি চাপশব্দৈঃ" ইত্যাদৌ ব্যাকরণপর্যাযত্বেন শিষ্টৈর্ব্যবহৃতত্বাত্৷ এতদঙ্গান্তরাণামুপলক্ষণম্, ষডঙ্গবিদামগ্রেসরমিত্যর্থঃ৷ এতেন বেদার্থাভিজ্ঞত্বমর্থসিদ্ধম্৷ যদ্বা বাগ্বিদঃ যাবদ্বিবক্ষিতার্থপ্রতিপাদনক্ষমশব্দপ্রযোগবিদঃ, তেষাং বরম্৷ পূর্বং বেদাধ্যযনমুক্তম্, অত্র তদধ্যাপনম্৷ যদ্বা গোবলীবর্দন্যাযেন বাচঃ বেদব্যতিরিক্তানি শাস্ত্রাণি, তদ্বিদাং বরম্৷ অনেন চতুর্দশবিদ্যাস্থানবেদিত্বমুক্তম্৷ যদ্বা ভূমবিদ্যোপক্রমে নারদেনাত্মনঃ সর্ববিদ্যাভিজ্ঞত্বমুক্তম্৷ "ঋগ্বেদং ভগবোধ্যেমি যজুর্বেদং সামবেদমাথর্বণং চতুর্থমিতিহাসপুরাণং পঞ্চমং বেদানাং বেদং পিত্র্যং রাশিং দৈবং নিধিঃ বাকোবাক্যমেকাযনং দেববিদ্যাং ব্রহ্মবিদ্যাং ভূতবিদ্যাং ক্ষত্রবিদ্যাং নক্ষত্রবিদ্যাং সর্পদেবজনবিদ্যামেতদ্ভগবোধ্যেমি" ইতি৷ তদিদমুচ্যতে বাগ্বিদাং বরমিতি৷ যদ্বা বাক্ সরস্বতী "গীর্বাগ্বাণী সরস্বতী" ইতি বচনাত্৷ তযা বিদ্যন্তে লভ্যন্ত ইতি বাগ্বিদঃ সরস্বতীপুত্রা মরীচ্যাদযঃ৷ "বিদ্লৃ লাভে" ইত্যস্মাদ্ধাতোঃ কর্মণি ক্বিপ্৷ ভগবদ্ভক্ততযা তেষাং বরম্৷ অনেনাভিজাত্যমুক্তম্৷ তপঃস্বাধ্যাযনিরতমিত্যনেন বিদ্যোক্তা৷ সমাহিতত্বমাহ- মুনিপুঙ্গবমিতি৷ তেন "অভিজনবিদ্যাসমুদেতং সমাহিতং সংস্কর্ত্তারমীপ্সেত্" ইত্যাপস্তম্বোক্তমাচার্যলক্ষণং জ্ঞাপিতম্৷ মুনযো মননশীলাঃ৷ "মনেরুচ্চ" ইতি ইন্ প্রত্যযঃ৷ পুমাংশ্চাসৌ গৌশ্চেতি পুংগবঃ "গোরতদ্ধিতলুকি" ইতি সমাসান্তষ্টচ্ প্রত্যযঃ৷ শ্রেষ্ঠ

ইত্যর্থঃ ৷ "বুধে চ পুঙ্গবঃ শ্রেষ্ঠে বৃষভে ভিষজাং বরে ৷" ইতি বিশ্বঃ ৷ মুনিষু পুঙ্গবো মুনিপুঙ্গবঃ ৷ "সপ্তমী" ইতি যোগবিভাগাত্ নাগোত্তমাদিবত্সমাসঃ, তম্ ৷ তপঃস্বাধ্যাযনিরতমিত্যনেন বেদার্থস্য শ্রবণমুক্তম্ ৷ বাগ্বিদাং বরমিত্যনেন মননম্ ৷ মুনিপুঙ্গবমিত্যনেন নিদিধ্যাসনম্ ৷ যদ্বা "তস্মাদ্ব্রাহ্মণঃ পাণ্ডিত্যন্নির্বিদ্য বাল্যেন তিষ্ঠাসেত্ ৷ বাল্যং চ পাণ্ডিত্যং চ নির্বিদ্যাথ মুনিঃ" ইত্যুক্তক্রমেণ ত্রিভিরেতৈঃ পদৈঃ পাণ্ডিত্যবাল্যমৌনান্যুক্তানি ৷ নরস্য সম্বন্ধি নারম্ "নরাচ্চেতি বক্তব্যম্" ইত্যণ্, অজ্ঞানমিত্যর্থঃ ৷ তত্ দ্যতি খণ্ডযতীতি নারদঃ ৷ "দো অবখণ্ডনে" ইত্যস্মাদ্ধাতোঃ "আদেচ উপদেশে শিতি" ইত্যাত্বে সতি "আতো নুপসর্গে কঃ" ইতি কপ্রত্যযঃ ৷ অজ্ঞাননিবর্ত্তক ইত্যর্থঃ ৷ উক্তং চ নারদীযে- "গাযন্নারাযণকথাং সদা পাপভযাপহাম্ ৷ নারদো নাশযন্নেতি নৃণামজ্ঞানজং তমঃ ৷৷" ইতি৷ যদ্বা নারং জ্ঞানং তদ্দদাতীতি নারদঃ৷ যদ্বা নরতি সদ্গতিং প্রাপযতীতি নরঃ পরমাত্মা৷ "নৃ় নযে" ইত্যস্মাদ্ধাতোঃ পচাদ্যচ্৷ তদুক্তং ভারতে "নরতীতি নরঃ প্রোক্তঃ প্ররমাত্মা সনাতনঃ" ইতি৷ স এব নারঃ৷ তং দদাত্যুপদিশতীতি নারদঃ, তম্৷ এবমাচার্যলক্ষণপূর্তিমুক্ত্বা অধিকারিত্বসম্পূর্তিপ্রদর্শনায শিষ্যলক্ষণমাহ- তপস্বীত্যাদিনা৷ তপোস্যাস্তীতি তপস্বী৷ "তপঃসহস্রাভ্যাং বিনীনী" ইতি মত্বর্থীযো বিনিপ্রত্যযঃ৷ ভূমাদযো মত্বর্থাঃ৷ তদুক্তম্ "ভূমনিন্দাপ্রশংসাসু নিত্যযোগেতিশাযনে৷ সংসর্গেস্তিবিবক্ষাযাং ভবন্তি মতুবাদযঃ ৷৷" ইতি ৷ প্রশস্ততপস্ক ইত্যর্থঃ ৷ তেন "তপসা ব্রহ্ম বিজিজ্ঞাসস্ব স তপো তপ্যত স তপস্তপ্ত্বা আনন্দো ব্রহ্মেতি ব্যজানাত্" ইতি শ্রুতং ব্রহ্মজ্ঞানসাধনং তপ উক্তম্ ৷ যদ্বা তপো বেদো ব্যাকরণং জ্ঞানং চ, তদ্বান্ ৷ তপঃশব্দানাং তন্ত্রাবৃত্ত্যেকশেষাদ্যন্যতমেন অর্থস্মরণে

সতি একপদোপাত্তকৃতিকালাদীনামিব অন্বযবোধঃ সুলভঃ ৷ তথা চ- অধীতসাঙ্গসশিরস্কবেদো ধিগতাল্পাস্থিরফলকেবলকর্মজ্ঞান ইত্যুক্তম্ ৷ নির্বেদশ্চ তপঃ ৷ "তপস্বী

তাপসে শোচ্যে" ইতি বৈজযন্তী ৷ তেন সঞ্জাতমোক্ষাভিলাষ ইত্যুক্তম্, তাদৃশ এব হি ব্রহ্মজ্ঞানাধিকারী ৷ তপস্বীত্যনেন শমদমাদিসম্পত্তিরপি সিদ্ধা ৷ যদ্বা তপো ন্যাসঃ ৷ "তস্মান্ন্যাসমেষাং তপসামতিরিক্তমাহুঃ" ইতি শ্রুতেঃ ৷ ন্যাসঃ শরণাগতিঃ প্রণিপাতরূপা, এবং 'তদ্বিদ্ধি প্রণিপাতেন পরিপ্রশ্নেন সেবযা' ইত্যাদ্যুক্তানি প্রণিপাতপুরঃসরাণি দর্শিতানি ৷ বল্মীকস্যাপত্যং বাল্মীকিঃ ৷ "অত ইঞ্" ইতীঞ্প্রত্যযঃ ৷ নন্বসৌ কথং বল্মীকাপত্যম্, যতো যং ভৃগুপুত্র এব প্রতীযতে ৷ তথা চ শ্রীবিষ্ণুপুরাণে- "ঋক্ষো ভূদ্ভার্গবস্তস্মাদ্বাল্মীকির্যো ভিধীযতে" ইতি ৷ অত্রাপি উত্তরকাণ্ডে বক্ষ্যতি "ভার্গবেণেতি সংস্কৃতৌ ৷ ভার্গবেণ তপস্বিনা" ইতি চ ৷ অন্যত্র চ প্রচেতো পত্যত্বমভিধীযতে "চক্রে প্রচেতসঃ পুত্রস্তং ব্রহ্মাপ্যন্বমন্যত" ইতি ৷ "বেদঃ প্রাচেতসাদাসীত্" ইতি চ প্রসিদ্ধম্ ৷ অতঃ কথমস্য বল্মীকাপত্যত্বম্ ? উচ্যতে- নিশ্চলতরতপোবিশেষেণাস্য বল্মীকাবৃতৌ জাতাযাং প্রচেতসা বরুণেন কৃতনিরন্তরবর্ষেণ প্রাদুর্ভাবো ভূদিতি ভৃগুপুত্রস্যৈবাস্য প্রচেতসো পত্যত্বং বল্মীকাপত্যত্বং চ সঙ্গচ্ছতে ৷ ননু কথং তত্প্রভবত্বমাত্রেণ তদপত্যত্বম্ ? মৈবম্, 'গোণীপুত্রঃ কলশীসুতঃ' ইত্যাদিব্যবহারস্য তত্প্রভবে পি বহুলমুপলব্ধেঃ ৷ উক্তং চ ব্রহ্মবৈবর্ত্তে "অথাব্রবীন্মহাতেজা ব্রহ্মা লোকপিতামহঃ ৷ বল্মীকপ্রভবো যস্মাত্তস্মাদ্বাল্মীকিরিত্যসৌ ৷৷" ইতি৷ মাস্ত্বপত্যার্থত্বম্, তথাপি বাল্মীকিশব্দস্সাধুরেব, গর্হাদিষু পঠিতত্বাত্৷ যদ্বা ভৃগুবংশ্যঃ কশ্চিত্ প্রচেতা নাম তস্যাযং পুত্রঃ ঋক্ষো নাম৷ 'চক্রে প্রচেতসঃ পুত্রঃ' ইতি পুত্রত্বাভিধানাত্৷ ভার্গবভৃগুনন্দনশব্দৌ রামে রাঘবরঘুনন্দনশব্দবদুন্নেযৌ৷ বাল্মীকিশব্দঃ পুত্রত্বোপচারাত্৷ অত এব ক্বচিত্ 'বাল্মীকেন মহর্ষিণ' ইতি সম্বন্ধমাত্রেণ্ প্রযুজ্যতে৷ সত্স্বপি নামান্তরেষু বাল্মীকিশব্দেনাভিধানং জ্ঞানাঙ্গশমদমাদ্যুপেতত্বস্ফোরণায৷ পরিপপ্রচ্ছ পরি বিশেষেণ পৃষ্টবান্৷ কো ন্বস্মিন্নিত্যাদিবক্ষ্যমাণমিতি শেষঃ৷ তপ ইতি ভিন্নং পদং বা ব্রহ্মবাচি৷ নারদং ব্রহ্ম পরিপপ্রচ্ছেত্যর্থঃ৷ অতো ন দ্বিকর্মকত্বহানিঃ৷ উক্তং হি বৃত্তিকৃতা- "দুহ্যাচ্পচ্দণ্ড্রুধিপ্রচ্ছিচিঞ্ব্রূশাসুজিমথ্মুষাম্৷" ইত্যাদিনা প্রচ্ছের্দ্বিকর্মকত্বম্৷ পরিপপ্রচ্ছেতি পরোক্ষে লিট্৷ প্রশ্নস্য পরোক্ষত্বং বিবক্ষিতভগবদ্গুণানুসন্ধানকৃতবৈচিত্যাত্, 'সুপ্তোহং কিল বিললাপ' ইতিবত্৷ বিভক্তিপ্রতিরূপকমব্যযং বা৷ স্ববিনযব্যঞ্জনায প্রথমপুরুষনির্দেশো বা৷ "ঈশ্বরঃ সর্বভূতানাং হৃদ্দেশের্জুন তিষ্ঠতি" ইতিবত্৷ স্বস্মিন্নন্যত্বমারোপ্য পরোক্ষনির্দেশো বা৷ অনেন- "পরীক্ষ্য লোকান্ কর্মচিতান্ ব্রাহ্মণো নির্বেদমাযাত্ নাস্ত্যকৃতঃ কৃতেন৷ তদ্বিজ্ঞানার্থং স গুরুমেবাভিগচ্ছেত্সমিত্পাণিঃ শ্রোত্রিযং ব্রহ্মনিষ্ঠম্৷ তস্মৈ স বিদ্বানুপসন্নায সম্যক্ প্রশান্তচিত্তায শমান্বিতায৷ যেনাক্ষরং পুরুষং বেদ সত্যং প্রোবাচ তাং তত্ত্বতো ব্রহ্মবিদ্যাম্" ইত্যাথর্বণিকী শ্রুতির্গুরূপসদনবিষযোপবৃংহ্যতে৷ তথাহি- তপস্বীত্যনেন "পরীক্ষ্য লোকান্ কর্মচিতান্ ব্রাহ্মণো নির্বেদমাযাত্" ইত্যস্যার্থোদর্শি৷ অধীতসাঙ্গসশিরস্কবেদোধিগতাল্পাস্থিরফলকেবলকর্মজ্ঞানতযা সঞ্জাতমোক্ষাভিলাষো হি তপস্বিশব্দার্থো বর্ণিতঃ৷ বাল্মীকিরিত্যনেন "সম্যক্ প্রশান্তচিত্তায শমান্বিতায" ইত্যস্যার্থো দর্শিতঃ৷ স্বাধ্যাযনিরতমিত্যনেন শ্রীত্রিযপদার্থ উক্তঃ৷ "শ্রোত্রিযঁশ্ছন্দোধীতে" ইতি শ্রোত্রিযশব্দার্থপ্রকাশনাত্৷ বাগ্বিদাং বরমিত্যনেন বিদ্বচ্ছব্দার্থঃ৷ মুনিপুঙ্গবমিত্যনেন ব্রহ্মনিষ্ঠশব্দার্থঃ৷ নারদশব্দনে গুরুশব্দার্থঃ৷ "গুশব্দস্ত্বন্ধকারঃ স্যাদ্রুশব্দস্তন্নিরোধকঃ৷ অন্ধকারনিরোধিত্বাদ্গুরুরিত্যভিধীযতে" ইতি তন্নিরুক্তিঃ৷ পরিপপ্রচ্ছেত্যনেন "তদ্বিজ্ঞানার্থং স গুরুমেবাভিগচ্ছেত্" ইত্যেতদুপপাদিতম্৷ "বিধিবদুপসন্নঃ পপ্রচ্ছ" ইতি শ্রুতেঃ৷ অত্র ব্রহ্মবাচিতপঃশব্দপ্রযোগেণ দেবতানমস্কাররূপং মঙ্গলমাচরিতম্৷ তথোক্তম্- "অ ইতি ভগবতো নারাযণস্য প্রথমাভিধানমভিদধতা কিন্নাম মঙ্গলং ন কৃতম্" ইতি৷ "দেবতাবাচকাঃ শব্দা

যে চ ভদ্রাদিবাচকাঃ ৷ তে সর্বে মঙ্গলার্থাঃ স্যুর্লিপিতো গণতো পি চ ৷৷" ইতি৷ নিরন্তরনিরতিশযানন্দরূপং তপো জ্ঞানরূপং ব্রহ্ম স্বাধ্যাযং সুষ্ঠু ধ্যাত্বেতি বা দেবতানমস্কারঃ৷

গুরুনমস্কারশ্চ কৃতো ভবতি ৷ কথম্ ? তপঃসু নিরতং নারদমাধ্যায পরিপপ্রচ্ছেতি ৷ যদ্বা পরি পূজযিত্বেত্যর্থঃ ৷ "পরিঃ সমন্ততোভাব ব্যাপ্তিদোষকথাসু চ ৷ ভাষাশ্লেষে পূজনে চ বর্জনে বচনে শুভে ৷৷" ইতি বচনাত্৷ নারদং সম্পূজ্য পপ্রচ্ছেত্যর্থঃ৷ "পরাশরং মুনিবরং কৃতপৌর্বাহ্ণিকক্রিযম্৷ মৈত্রেযঃ পরিপপ্রচ্ছ প্রণিপত্যাভিবাদ্য চ ৷৷" ইতিবত্ ৷৷ অস্য শ্রীরামাযণস্য গাযত্র্যক্ষরসঙ্খ্যানুসারেণ চতুর্বিংশতিসহস্রগ্রন্থসঙ্খ্যযা প্রবৃত্তত্বাত্ প্রথম সহস্রোপক্রমে তকারঃ প্রযোক্তব্য ইতি সত্স্বপি ব্রহ্মবাচকেষু শব্দান্তরেষু তপঃশব্দস্যৈব প্রযোগঃ ৷ প্রবন্ধাদৌ তকারপ্রযোগশ্চাবশ্যকঃ ৷ তস্য বক্তুর্বাচকস্য চ সৌখ্যকরত্বাত্ ৷ তথোক্তম্ "বস্তুলাভকরো ণস্তু তকারঃ সৌখ্যদাযকঃ" ইতি ৷ সাহিত্যচূডামণৌ তু- "তকারো বিঘ্ননাশকঃ" ইত্যুক্তম্ ৷ কিঞ্চ তকারস্য জলং ভূতং বৃহস্পতির্দেবতা ৷ অতঃ শুভাবহো নেন প্রবন্ধারম্ভঃ ৷ অত এবোক্তং চমত্কারচন্দ্রিকাযাম্- "বর্ণানামুদ্ভবঃ পশ্চাদ্ব্যক্তিঃ সঙ্খ্যা ততঃ পরম্ ৷ ভূতবীজবিচারশ্চ ততো বর্ণগ্রহা অপি ৷৷" ইত্যারভ্য "এতত্সর্বমবিজ্ঞায যদি পদ্যং বদেত্কবিঃ৷ কেতকারূঢকপিবত্ ভবেত্কণ্টকপীডিতঃ ৷৷" ইতি ৷ "কারণাত্পঞ্চভূতানামুদ্ভূতা মাতৃকা যতঃ ৷ অতো ভূতাত্মকা বর্ণাঃ পঞ্চপঞ্চ বিভাগতঃ ৷ বায্বগ্নিভূজলাকাশাঃ পঞ্চাশল্লিপযঃ ক্রমাত্ ৷ পঞ্চ হ্রস্বাঃ পঞ্চ দীর্ঘা বিন্দ্বন্তাঃ সন্ধযস্তথা ৷ তত্র স্বরেশঃ সূর্যো যং কবর্গেশস্তু লোহিতঃ ৷ চবর্গপ্রভবঃ কাব্যষ্টবর্গাদ্বুধসম্ভবঃ ৷ তবর্গোত্থঃ সুরগুরুঃ পবর্গোত্থঃ শনৈশ্চরঃ ৷ যবর্গজো যং শীতাংশুরিতি সপ্তগ্রহাঃ ক্রমাত্ ৷৷" ইতি৷ অত্র তপঃস্বা ইতি যগণঃ, আদিলঘুত্বাত্৷ তদুক্তম্- "আদিমধ্যাবসানেষু যরতা যান্তি লাঘবম্৷ ভজসা গৌরবং যান্তি মনৌ তু গুরুলাঘবম্ ৷৷" ইতি ৷ যগণপ্রযোগশ্চার্থকর ইত্যুক্তং চমত্কারচন্দ্রিকাযাম্- "করোত্যর্থানাদিলঘুর্যগণো বাযুদৈবতঃ" ইতি ৷ ননু তপস্তাপঃ সুতরামাধিঃ স্বাধিস্তযোরাযে নিরতমিতি গ্রন্থারম্ভে অশ্লীলবচনমনুচিতম্ ৷ তদুক্তম্- "অশ্লীলং যদমাঙ্গল্যং জুগুপ্সাব্রীডভীকরম্" ইতি ৷ মৈবম্, প্রসিদ্ধিবিশেষেণ তপোবেদযোরেব প্রথমতরং বুদ্ধ্যারোহেণাশ্লীলত্বপ্রসঙ্গাভাবাত্ ৷ যথা ভগিনীলিঙ্গাদিপ্রযোগেষু ৷ অত্র সর্বত্র প্রাযেণ পথ্যাবক্ত্রং বৃত্তম্ ৷ তদুক্তং বৃত্তরত্নাকরে- "যুজোর্জেন সরিদ্ভর্ত্তুঃ পথ্যাবক্ত্রং প্রকীর্ত্তিতম্" ইতি ৷ বৃত্তবিশেষাস্তু তত্র তত্র বক্ষ্যন্তে ৷ অত্র বৃত্ত্যনুপ্রাসঃ শব্দালঙ্কারঃ, তকারাদীনামাবৃত্তেঃ ৷ তদুক্তং কাব্যপ্রকাশে- "বর্ণসাম্যমনুপ্রাসঃ" ইতি ৷ বিশেষণানাং সাভিপ্রাযত্বাত্ পরিকরোনামার্থালঙ্কারঃ ৷ উক্তমলঙ্কারসর্বস্বে "বিশেষণানাং সাভিপ্রাযত্বে পরিকরঃ" ইতি ৷ তপঃস্বাধ্যাযনিরতত্বাদীনাং গুরূপসত্তিহেতুজ্ঞানানুষ্ঠানপ্রতিপাদকত্বাত্ পদার্থহেতুকং কাব্যলিঙ্গমলঙ্কারঃ ৷ "হেতোর্বাক্যপদার্থত্বে কাব্যলিঙ্গমলংকৃতিঃ" ইতি লক্ষণাত্ ৷ অত্র বাল্মীকিনারদযোঃ স্বরূপকথনেন শিষ্যাচার্য্যাভ্যামেবং ভবিতব্যমিতি দ্যোতনাত্ বাক্যগতবস্তুনা বস্তুধ্বনিঃ ৷৷ 1.1.1 ৷৷



কো ন্বস্মিন্ সাম্প্রতং লোকে গুণবান্ কশ্চ বীর্যবান্ ৷

ধর্মজ্ঞশ্চ কৃতজ্ঞশ্চ সত্যবাক্যো দৃঢব্রতঃ ৷৷ 1.1.2 ৷৷

কথং পরিপপ্রচ্ছেত্যাকাঙ্ক্ষাযাং প্রশ্নপ্রকারং দর্শযতি- কো ন্বিত্যাদিশ্লোকত্রযেণ ৷ "নুঃ পৃচ্ছাযাং বিকল্পে চ" ইত্যুমরঃ ৷ অস্মিন্ লোকে ভূলোকে সাম্প্রতমস্মিন্ কালে "অস্মিন্কালে ধুনেদানীং সম্প্রত্যেতর্হি সাম্প্রতম্" ইতি বাণঃ ৷ লোকান্তরে বিষ্ণোর্বিদিতত্বাত্ ৷ অত্রৈব কালান্তরে নৃসিংহাদেঃ প্রসিদ্ধত্বাচ্চ তদ্ব্যাবৃত্ত্যর্থমেবমুক্তম্ ৷ গুণা অস্য সন্তীতি গুণবান্ ৷ ভূমাদযো মত্বর্থাঃ ৷ অস্মিন্ লোকে অস্মিন্ কালে কো বা সকলকল্যাণগুণসম্পন্ন ইত্যর্থঃ ৷ এবং সামান্যেন গুণসমুদাযং পৃষ্ট্বা বিশিষ্য

তত্তদ্গুণাশ্রযং পৃচ্ছতি- কশ্চ বীর্যবান্ ইত্যাদিনা ৷ যদ্বা গুণ্যতে আবর্ত্যতে পুনঃপুনরাশ্রিতৈরনুসন্ধীযত ইতি গুণঃ সৌশীল্যম্ ৷ "গুণস্ত্বাবৃত্তিশব্দাদিজ্যেন্দ্রিযামুখ্যতন্তুষু" ইতি বিশ্বঃ ৷ সুশীলং হি নাম মহতো মন্দৈঃ সহনীরন্ধ্রেণ সংশ্লেষঃ ৷ তস্যাধিক্যং সৌশীল্যম্, তদ্বান্ ৷ সৌশীল্যে গুণশব্দো ভিযুক্তৈঃ প্রযুক্তঃ ৷ "বশী বদান্যো গুণবানৃজুঃ শুচিঃ" ইতি ৷ কো বা সৌশীল্যবানিত্যর্থঃ ৷ সর্বত্র প্রশ্নে তু নু ইতি কিংশব্দো পি যত্র ন প্রযুক্তস্তত্রানুষঞ্জনীযঃ ৷ একেনৈব কিংশব্দেনোপপত্তাবপ্যাদরাতিশযাত্ পুনঃপুনস্তত্প্রযোগঃ ৷ "প্রদানবদেব তদুক্তম্" ইতি ন্যাযেন প্রতিগুণং গুণ্যাবৃত্ত্যভিপ্রাযেণ বা লোকে গুণসম্বন্ধাদ্গুণ্যতিশযঃ ৷ ইহ তু গুণিসম্বন্ধাদ্গুণাতিশয ইতি দ্যোতনায গুণিনঃ প্রথমং নির্দেশঃ "গুণাস্সত্যজ্ঞান- " ইত্যুক্তেঃ ৷ কশ্চ বীর্য্যবান্ ৷ চকার উক্তসমুচ্চযে ৷ সত্স্বপি বিকারহেতুষ্ববিকৃতত্বং বীর্যম্ 'ঔষধং বীর্যবত্' ইত্যাদৌ তথা দর্শনাত্, তদ্বান্ ৷ ধর্মঃ অলৌকিকশ্রেযঃসাধনম্, তং সামান্যরূপং বিশেষরূপং চ জানাতীতি ধর্মজ্ঞঃ ৷ চকারো নুক্তসমুচ্চযার্থঃ ৷ পরিহার্যাধর্মজ্ঞশ্চেত্যর্থঃ ৷ কৃতমুপকারং স্বল্পং প্রাসঙ্গিকমপি বহুতযা জানাতীতি কৃতজ্ঞঃ ৷ অপকারাস্মরণং চশব্দার্থঃ ৷ বক্ষ্যতি- "ন স্মরত্যপকারাণাং শতমপ্যাত্মবত্তযা ৷ কথঞ্চিদুপকারেণ কৃতেনৈকেন তুষ্যতি ৷৷" ইতি৷ সত্যং কৃচ্ছ্রেষ্বপ্যনৃতশূন্যং বাক্যং বচনং যস্য সঃ সত্যবাক্যঃ৷ তথা বক্ষ্যতি- "অনৃতং নোক্তপূর্বং মে ন চ বক্ষ্যে কদাচন" ইতি৷ দৃঢব্রতঃ নিশ্চলসঙ্কল্পঃ৷ "অপ্যহং জীবিতং জহ্যাং ত্বাং বা সীতে সলক্ষ্মণাম্৷ ন হি প্রতিজ্ঞাং সংশ্রুত্য ব্রাহ্মণেভ্যো বিশেষতঃ ৷৷" ইতি ৷৷ 1.1.2 ৷৷



চারিত্রেণ চ কো যুক্তঃ সর্বভূতেষু কো হিতঃ ৷

বিদ্বান্ কঃ কঃ সমর্থশ্চ কশ্চৈকপ্রিযদর্শনঃ ৷৷ 1.1.3 ৷৷

চরিত্রমাচারঃ তদেব চারিত্রম্ ৷ বাযসরাক্ষসাদিবত্স্বার্থে ণ্প্রত্যযঃ ৷ তেন যুক্তঃ, সর্বদাপ্যনুল্লঙ্ঘিতকুলাচার ইত্যর্থঃ ৷ সর্বভূতেষু সর্বপ্রাণিষু বিষযে ৷ "ভূতং ক্ষ্মাদৌ চ জন্তৌ চ ন স্ত্রিযাং গুণসত্ত্বযোঃ" ইতি বাণঃ ৷ হিতঃ হিতকরঃ ৷ হিতশব্দাত্ "তত্করোতি" ইতি ণিচ্, পচাদ্যচ্, ণিলোপে পূর্বরূপে চ রূপম্ ৷ ভূতশব্দেন স্বপরতারতম্যাভাব উক্তঃ ৷ সর্বশব্দেন সাপরাধেষ্বপি হিতকরত্বমুক্তম্ ৷ বেত্তীতি বিদ্বান্ সর্বশাস্ত্রজ্ঞঃ ৷ "বিদেঃ শতুর্বসুঃ" ৷ সমর্থঃ সর্বকার্যধুরন্ধরঃ ৷ প্রিযং দর্শনং যস্যাসৌ প্রিযদর্শনঃ, একশ্চাসৌ প্রিযদর্শনশ্চ একপ্রিযদর্শনঃ ৷ অযমিব নান্যো লোকে প্রিযদর্শনো স্তীত্যর্থঃ ৷ যদ্বা একপ্রিযদর্শনঃ একরূপপ্রিযদর্শনঃ ৷ লোকে হি কস্যচিদ্দর্শনং কদাচিত্প্রিযং ভবতি কদাচিদপ্রিযং চ ভবতি ৷ "তস্মাদ্দুঃখাত্মকং নাস্তি ন চ কিঞ্চিত্সুখাত্মকম্" ইতি বচনাত্ ৷ অযং তু ন তথা, কিন্তু "ক্ষণে ক্ষণে যন্নবতামুপৈতি তদেব রূপং রমণীযতাযাঃ" ইত্যুক্তরীত্যা সদানুভবে প্যপূর্ববদ্বিস্মযমাদধান ইত্যর্থঃ ৷ তথৈবোত্তরযিষ্যতি- সদৈকপ্রিযদর্শন ইতি ৷ "একে মুখ্যান্যকেবলাঃ" ইত্যুভযত্রাপ্যমরঃ ৷৷ 1.1.3 ৷৷



আত্মবান্ কো জিতক্রোধো দ্যুতিমান্ কো নসূযকঃ ৷

কস্য বিভ্যতি দেবাশ্চ জাতরোষস্য সংযুগে ৷৷ 1.1.4 ৷৷

আত্মবানিতি ৷ আত্মবান্ ধৈর্যবান্ ৷ "আত্মা জীবে ধৃতৌ দেহে স্বভাবে পরমাত্মনি" ইত্যমরঃ ৷ অপ্রকম্প্যধৈর্য ইত্যর্থঃ ৷ জিতক্রোধঃ বিধেযকোপঃ দণ্ডার্হেষ্বেবাহিতকোপ ইত্যর্থঃ ৷ "ক্রোধমাহারযত্তীব্রম্" ইতি হি বক্ষ্যতি ৷ দ্যুতিমান্ কান্তিমান্ "রূপসংহননং লক্ষ্মীং সৌকুমার্য্যং সুবেষতাম্ ৷ দদৃশুর্বিস্মিতাকারা রামস্য বনবাসিনঃ ৷৷" ইতি হি বক্ষ্যতি৷

গুণেষু দোষাবিষ্করণমসূযা ৷ "অসূযা তু দোষারোপো গুণেষ্বপি" ইত্যমরঃ ৷ অবিদ্যমানাসূযা

যস্যাসাবনসূযকঃ ৷ "শেষাদ্বিভাষা" ইতি কপি "আপো ন্যতরস্যাম্" ইতি হ্রস্বঃ ৷ যদ্বা অসূযকঃ অসূঙ্কণ্ড্বাদৌ পঠিতঃ ৷ তস্মাত্ "কণ্ড্বাদিভ্যো যক্" ইতি যক্প্রত্যযঃ ৷ "অকৃত্সার্বধাতুকযোঃ" ইতি দীর্ঘঃ ৷ ততো "নিন্দহিংস- " ইত্যাদিনা বুঞ্ ৷ স ন ভবতীত্যনসূযকঃ ৷ কস্যেতি ৷ দেবাশ্চেতি চকারেণাসুরাদযঃ সমুচ্চীযন্তে ৷ জাতরোষস্য কস্য সংযুগে দেবাদযঃ সর্বে বিভ্যতীত্যন্বযঃ ৷ অতো ন "ভীত্রার্থানাং- " ইতি কিংশব্দাত্পঞ্চমী ৷ শত্রুবিষযঃ কোপো মিত্রাণামপি ভযমাবহতীত্যর্থঃ ৷ যদ্বা চকারো প্যর্থঃ ৷ অনুকূলা অপি বিভ্যতি, কিং পুনঃ প্রতিকূলা ইত্যর্থঃ ৷ যদ্বা সংযুগে জাতরোষস্য কস্য বিভ্যতীত্যেবান্বযঃ ৷ শেষে ষষ্ঠী ৷ "সঞ্জ্ঞাপূর্বকো বিধিরনিত্যঃ" ইত্যপাদানসঞ্জ্ঞাপূর্বকপঞ্চম্যভাবঃ ৷ অত্র শ্লোকত্রযে সমৃদ্ধিমদ্বস্তুবর্ণনাদুদাত্তালঙ্কারঃ ৷৷ 1.1.4 ৷৷



এতদিচ্ছাম্যহং শ্রোতুং পরং কৌতূহলং হি মে ৷

মহর্ষে ত্বং সমর্থো সি জ্ঞাতুমেবংবিধং নরম্ ৷৷ 1.1.5 ৷৷

অথাযং প্রশ্নো বিজিগীষামূলমিতি নারদো মন্যেতাপীতি মন্বানঃ স্বপ্রশ্নো জিজ্ঞাসাহেতুক ইতি দর্শযন্ প্রশ্নমুপসংহরতি- এতদিতি ৷ এতত্পূর্বোক্তগুণাশ্রযভূতং বস্তু অহং জিজ্ঞাসুঃ ন বিজিগীষুঃ, শ্রোতুং ন তু ক্ষেপ্তুমিচ্ছামি, ন তু ব্রূহি ইতি নির্বধ্নামি ৷ অহং তাবদিচ্ছামি মযি ভবতঃ প্রসাদো স্তি চেদ্বক্তুমর্হসীতি ভাবঃ ৷ তত্র হেতুমাহ- পরমিতি ৷ হির্হেতৌ ৷ "হির্হেতাববধারণে" ইতি বাণঃ ৷ যস্মাত্কারণান্মে পরমুত্কৃষ্টং কৌতূহলং বিস্মযো স্তি তস্মাদিচ্ছামি ৷ যদ্বা হিঃ প্রসিদ্ধৌ ৷ মুখবিকাসাদ্যনুভাবৈর্মম হর্ষস্তব স্পষ্ট ইত্যর্থঃ ৷ স্বপ্রশ্নোত্তরদানে দেশিকালাভান্নির্বিণ্ণঃ ৷ সম্প্রতি ভবদ্দর্শনেন সঞ্জাতাভিলাষো স্মি, ব্রূহি মত্পৃষ্টমিতি ভাবঃ ৷ "আচার্যস্য জ্ঞানবত্তামনুমায শিষ্যেণোপ(স)পত্তিঃ ক্রিযতে" ইতি ন্যাযেন নারদস্য প্রষ্টব্যবিষযজ্ঞানসম্ভাবনামাহ- মহর্ষ ইতি ৷ ঋষিঃ জ্ঞানস্য পারং গন্তা ৷ "ঋষী গতৌ" ইত্যস্মাদ্ধাতোঃ "ইগুপধাত্কিত্" ইতীন্ ৷ গত্যর্থো জ্ঞানার্থঃ ৷ মহাংশ্চাসৌ ঋষিশ্চ মহর্ষিঃ ৷ "আন্মহতঃ সমানাধিকরণজাতীযযোঃ" ইত্যাত্বম্ ৷ হেতুগর্ভবিশেষণম্ ৷ মহর্ষিত্বাত্ত্বমেবংবিধং নরং পুরুষং জ্ঞাতুমর্হসি ৷ ব্রহ্মণঃ সকাশাদ্বিদিতসকলবিশেষস্ত্বং কথং মে জিজ্ঞাসোর্ন বদেরিতি ভাবঃ ৷ অত্র পূর্বার্ধে কাব্যলিঙ্গমলঙ্কারঃ, উত্তরবাক্যার্থস্য পূর্ববাক্যার্থহেতুত্বাত্ ৷ "হেতোর্বাক্যপদার্থত্বে কাব্যলিঙ্গমলংকৃতিঃ ৷" ইতি লক্ষণাত্ ৷ উত্তরার্দ্ধে পরিকর ইতি অনযোঃ সংসৃষ্টিঃ ৷ অন্তে চাস্যেতি করণং বোধ্যম্ ৷ ইতি পরিপপ্রচ্ছেতি সম্বন্ধঃ ৷ নন্বযং প্রশ্নো বাল্মীকের্ন সঙ্গচ্ছতে, তস্য বিদিতসকলরামবৃত্তান্তত্বেন নিশ্চযে সংশযাযোগাত্ ৷ বক্ষ্যতি হ্যযোধ্যাকাণ্ডে- "ইতি সীতা চ রামশ্চ লক্ষ্মণশ্চ কৃতাঞ্জলিঃ ৷ অভিগম্যাশ্রমং সর্বে বাল্মীকিমভিবাদযন্ ৷৷" ইতি৷ কথং রামবিষযমধ্যবর্ত্তী বাল্মীকিস্তদ্গুণান্ন বিজানীযাত্? বক্ষ্যতি হি- "বিষযে তে মহারাজ রামব্যসনকর্শিতাঃ৷ অপি বৃক্ষাঃ পরিম্লানাঃ সপুষ্পাঙ্কুরকোরকাঃ ৷৷" ইতি ৷ কথং বা "রামো রামো রাম ইতি প্রজানামভবন্ কথাঃ ৷ রামভূতং জগদভূদ্রামে রাজ্যং প্রশাসতি ৷৷" ইতি পৃথগ্জনৈরপি বিদিতং রামবৈভবং মুনিরেষ ন জানীযাত্, কথং চৈতাবন্মাত্রং সত্যলোকাদাগতো নারদঃ প্রষ্টুমর্হতি, য এবমুত্তরযতি 'রামো নাম জনৈঃ শ্রুতঃ' ইতি৷ তত্রোচ্যতে- নাযমাপাততো ভাসমানঃ প্রশ্নার্থঃ নাপ্যুত্তরার্থঃ৷ অত্র করতলামলকবদ্বিদিতরামবৃত্তান্তস্য বাল্মীকেঃ কুতূহলাসম্ভবাত্ "বুদ্ধ্বা বক্ষ্যামি" ইত্যুত্তরবাক্যানুপপত্তেশ্চ৷ কিন্তু বক্তৃবোদ্ধ্রানুগুণ্যাত্ বেদান্তেষু নানাবিদ্যাসু তত্তদ্গুণবিশিষ্টতযাবগম্যমানং পরং তত্ত্বং কিং বিষ্ণুঃ, উত রুদ্রাদিষ্বন্যতম ইতি প্রশ্নার্থঃ৷ তদিদং বাল্মীকের্হৃদযমাকলযন্ ভগবান্নারদোপি রামত্বেনাবতীর্ণো বিষ্ণুরেব বেদান্তবেদ্যঃ পুরুষঃ, ব্রহ্মাদযঃ সর্বে তদ্ভৃকুটীভটাস্তত্পরতন্ত্রাঃ৷ সদ্ব্রহ্মাত্মাদিশব্দাশ্চ পর্যবসানবৃত্ত্যাবযববৃত্ত্যা চ বিষ্ণুপরা ইত্যেবমাশযেন সকলবেদান্তোদিতগুণজাতং রামে যোজযন্নুত্তরযতীতি সর্বমনবদ্যম্ ৷৷ 1.1.5

৷৷



শ্রুত্বা চৈতত্ ত্রিলোকজ্ঞো বাল্মীকের্নারদো বচঃ ৷

শ্রূযতামিতি চামন্ত্র্য প্রহৃষ্টো বাক্যমব্রবীত্ ৷৷ 1.1.6 ৷৷

এবং "তদ্বিজ্ঞানার্থং স গুরুমেবাভিগচ্ছেত্" ইত্যুক্তং গুরূপসদনবিধিমুপবৃংহয "যেনাক্ষরং পুরুষং বেদ সত্যং প্রোবাচ তাং তত্ত্বতো ব্রহ্মবিদ্যাম্ "ইত্যুক্তং প্রবচনবিধিমুপবৃংহযতি- শ্রুত্বেত্যাদিনা ৷ তত্র "নাসংবত্সরবাসিনে প্রব্রূযাত্" ইতি নিযমস্য জ্যেষ্ঠপুত্রব্যতিরিক্তবিষযত্বাত্ বাল্মীকেশ্চ ভৃগুপুত্রতযা ভ্রাতৃপুত্রত্বাত্ শুশ্রূষানিরপেক্ষং প্রীত্যোপদিদেশেত্যাহ- শ্রুত্বা চেতি ৷ ত্রযাণাং লোকানাং সমাহারস্ত্রিলোকম্ ৷

পাত্রাদিত্বান্ন ঙীপ্ ৷ যদ্বা ত্রিত্ববিশিষ্টো লোকস্ত্রিলোকঃ ৷ "নবরসরুচিরাম্" ইত্যত্র কাব্যপ্রকাশে তথৈব ব্যাখ্যানাত্ ৷ যদ্বা ত্রযো লোকা যস্মিন্ তত্ত্রিলোকমিতি ব্রহ্মাণ্ডমুচ্যতে, তজ্জানাতীতি ত্রিলোকজ্ঞঃ ৷ ভূর্ভুবঃস্বরিতি ত্রৈলোক্যম্ ৷ যদ্বা বিষ্ণুপুরাণোক্তরীত্যা কৃতকমকৃতকং কৃতকাকৃতকমিতি ত্রযো লোকাঃ ৷ মহর্লোকপর্যন্তাঃ কৃতকাঃ জনোলোকঃ কৃতকাকৃতকঃ ৷ সত্যলোকো কৃতক ইতি ৷ যদ্বা লোকা জনাঃ "লোকস্তু ভুবনে জনে" ইত্যমরঃ ৷ বদ্ধনিত্যমুক্তাস্ত্রযো লোকাঃ ৷ নারদঃ ব্রহ্মপুত্রতযা তজ্জ্ঞানার্হঃ ৷ এতত্পূর্বোক্তরীত্যা ব্যঙ্গ্যার্থগর্ভং বাল্মীকেঃ স্বাভিমতস্য পুত্রস্য বচঃ পরিপূর্ণার্থং বাক্যং শ্রুত্বা নিশম্য ৷ চকারেণ তদূহিত্বা চেত্যর্থঃ ৷ প্রহৃষ্টঃ স্বেনোপদিদিক্ষিতস্যৈব পৃষ্টত্বেন সন্তুষ্টঃ শতকোটিপ্রবিস্তররামাযণে স্বাবগতস্যৈবানেন পৃষ্টত্বাত্ রামগুণস্মরণামৃতপানলাভাদপূর্বশিষ্যলাভাদ্বা "সোহং মন্ত্রবিদেবাস্মি নাত্মবিত্" ইত্যুক্তরীত্যা সনত্কুমারং প্রতি স্বস্যোপসর্পণস্মারকত্বাদ্বাপ্রহৃষ্টঃ সন্ ৷ কর্ত্তরি ক্তঃ ৷ রামগুণানুসন্ধানজনিতং নিজবৈচিত্র্যং ব্যাজেন পরিহর্তুং শ্রূযতামিত্যামন্ত্র্যাভিমুখীকৃত্য বাক্যমুত্তররূপমব্রবীত্ ব্যক্তমুক্তবান্ ৷৷ 1.1.6 ৷৷



বহবো দুর্ল্লভাশ্চৈব যে ত্বযা কীর্ত্তিতা গুণাঃ ৷

মুনে বক্ষ্যাম্যহং বুদ্ধ্বা তৈর্যুক্তঃ শ্রূযতাং নরঃ ৷৷ 1.1.7 ৷৷

বক্ষ্যমাণস্যাসদুত্তরত্বপরিহারাযাত্মনো বাল্মীকেরাশযাভিজ্ঞত্বমাহ- বহব ইতি ৷ বহবো বিপুলাঃ, অনেকগুণবিততিমূলভূতা ইত্যর্থঃ ৷ অনেনাপৃষ্টানামপি বক্ষ্যমাণানাং গুণানাং নিদানমুপদর্শিতম্ যদ্বা বহবঃ অপরিচ্ছিন্না ইত্যর্থঃ ৷ শ্রূযতে হি অপরিচ্ছিন্নত্বং গুণানাম্ "যতো বাচো নিবর্তন্তে অপ্রাপ্য মনসা সহ ৷ আনন্দং ব্রহ্মণো বিদ্বান্ন বিভেতি কুতশ্চন" ইতি ৷ অত্রানন্দস্যৈকস্যাপরিচ্ছিন্নত্বোক্তিরিতরেষামপ্যপরিচ্ছিন্নত্ব প্রদর্শনার্থা ৷ উক্তং হি যামুনাচার্যৈঃ- "উপর্যুপর্যব্জভুবো পি পূরুষান্" ইত্যাদিনা ৷ দুর্লভাঃ পরমপুরুষাদন্যত্রাসম্ভাবিতাঃ, অন্যেষাং "ন ব্রহ্মা নেশানঃ" ইত্যাদিনা অসম্ভাব্যত্বাদিবচনাদিতি ভাবঃ ৷ অনেন প্রশ্নস্য দেবতাবিশেষনির্দ্ধারণপরত্বমাত্মনাবগতমিতি ব্যঞ্জিতম্ ৷ চকার উক্তসমুচ্চযার্থঃ অনুক্তসমুচ্চযার্থো বা ৷ তেন স্বাভাবিকানবধিকাতিশযাসঙ্খ্যেযকল্যাণরূপা ইত্যুক্তম্ ৷ এবকার ইতরত্র সর্বাত্মনা অসম্ভাবিতত্বমভিব্যনক্তি ৷ য ইতি বেদান্তপ্রসিদ্ধিরুচ্যতে ৷ গুণাঃ বীর্যাদযঃ কীর্তিতা ইত্যনেন গুণানাং প্রশ্নকালে পি ভোগ্যতাতিশযঃ সূচ্যতে ৷ তৈর্যুক্তঃ, ন তু কল্পিত ইতি নির্গুণবাদনিরাসঃ ৷ নরঃ পুরুষঃ ৷ "পুরুষাঃ পূরুষা নরাঃ" ইতি নিঘণ্টুঃ ৷ "য এষো ন্তরাদিত্যে হিরণ্মযঃ পুরুষো দৃশ্যতে" "পুরুষঃ পুণ্ডরীকাক্ষঃ" ইতি শ্রুতিস্মৃত্যনুগতঃ পুরুষশব্দো নেন প্রত্যভিজ্ঞাপ্যতে ৷ শ্রূযতাং ন তু যথাকথঞ্চিত্পরিকল্প্যতাম্ ৷ শৃণ্বিত্যনভিধানাত্ বিনযোক্তিরিযম্ ৷ তাত্কালিকং কিঞ্চিত্প্রকল্প্যত ইতি ভ্রমং বারযতি অহং বুদ্ধ্বা বক্ষ্যামীতি ৷ মত্পিতুর্ব্রহ্মণঃ সকাশাত্ শতকোটিপ্রবিস্তররামাযণমুখেন

বিদিত্বা বক্ষ্যামি ৷ অনেন সম্প্রদাযাভিজ্ঞত্বমাত্মনো দর্শিতম্ ৷ যদ্বা, রামগুণানুসন্ধানবৈচিত্র্যেন ন মে কিঞ্চিত্প্রতিভাতি, ক্ষণাত্ বুদ্ধ্বা বক্ষ্যামীত্যর্থঃ ৷ অতো মধ্যে বাক্যান্তরমলঙ্কারায ৷ অন্যথা বাক্যগর্ভিতমিতি কাব্যদোষঃ স্যাত্ ৷ অহং বক্ষ্যামি অহম্ভূত্বা বক্ষ্যামি, নেদানীং নারদো স্মি, রামগুণশ্রবণশিথিলত্বাত্ ৷ রামগুণমগ্নো যং নদীপ্রবাহমগ্ন ইব অবলম্বনযষ্টিমপেক্ষতে- হে মুন ইতি ৷ যদ্বা, প্রশ্নকালে সমবধানবিশেষমালক্ষ্য শ্লাঘতে মুন ইতি ৷ অথ ক্ষণাত্সন্ধুক্ষিতো নারদো বাক্যশেষং পূরযতি তৈরিতি ৷ নর ইত্যনেন পরতত্ত্বনির্দ্ধারণং প্রশ্নফলিতার্থং দ্যোতযতি ৷ বুদ্ধ্বা ইত্যনেন শ্রুতিস্থতত্তচ্ছব্দার্থো বিবৃতঃ ৷৷ 1.1.7 ৷৷



ইক্ষ্বাকুবংশপ্রভবো রামো নাম জনৈঃ শ্রুতঃ ৷

নিযতাত্মা মহাবীর্যো দ্যুতিমান্ ধৃতিমান্ বশী ৷৷ 1.1.8 ৷৷

অথ বেদান্তোদিতগুণানাং রামে প্রদর্শনমুখেন রামত্বেনাবতীর্ণো বিষ্ণুরেব বেদান্তবেদ্যং পরং তত্ত্বমিতি দর্শযতি- ইক্ষ্বাকুবংশপ্রভব ইত্যাদিনা সর্গশেষেণ ৷ তত্র বেদান্তোদিতগুণগণানাং নিধী রামত্বেনাবতীর্ণো বিষ্ণুরেবেতি মহাবাক্যার্থঃ ৷ ইক্ষ্বাকুবংশেত্যারভ্য সত্যে ধর্ম ইবাপর ইত্যন্তা সার্ধৈকাদশশ্লোক্যেকান্বযা ৷ ইক্ষ্বাকুর্নাম বৈবস্বতমনোর্জ্যেষ্ঠঃ পুত্রঃ, তস্য বংশঃ পুত্রপৌত্রাদিপরম্পরা ৷ প্রভবত্যস্মাদিতি প্রভবঃ প্রাদুর্ভাবস্থানম্ ৷ ইক্ষ্বাকুবংশঃ প্রভবো যস্য সঃ ইক্ষ্বাকুবংশপ্রভবঃ ৷ জনকাদিমহাকুলেষু বিদ্যমানেষু কুতো ত্রৈব ভগবানবতীর্ণ ইত্যপেক্ষাযামিক্ষ্বাকুপদং প্রযুক্তম্ ৷ ইক্ষ্বাকুর্হি চিরং হরিমারাধ্য তন্মূর্ত্তিবিশেষং শ্রীরঙ্গনাথমলভতেতি পৌরাণিকী গাথা ৷ অতস্তত্পক্ষপাতেন তদ্বংশে বতীর্ণ ইতি সূচযিতুমিক্ষ্বাকুপদম্ ৷ বংশেত্যনেন গুণবান্ ক ইতি পৃষ্টং সৌশীল্যমুক্তম্ ৷ রমযতি সর্বান্ গুণৈরিতি রামঃ ৷ "রামো রমযতাং বরঃ" ইত্যার্ষনির্বচনবলাত্ কর্তর্য্যপি কারকে ঘঞ্ বর্ণ্যতে ৷ যদ্বা রমন্তে স্মিন্ সর্বে জনা গুণৈরিতি রামঃ ৷ "অকর্ত্তরি চ কারকে সঞ্জ্ঞাযাম্" ইতি ঘঞ্ ৷ তথা চাগস্ত্যসংহিতাযামুক্তম্- "রমন্তে যোগিনো নন্তে সত্যানন্দে চিদাত্মনি ৷ ইতি রামপদেনাসৌ পরং ব্রহ্মাভিধীযতে ৷৷" ইতি নামেতি প্রসিদ্ধৌ৷ চিত্রকূটবাসিনা ত্বযা বিদিতো হীত্যর্থঃ৷ ন কেবলং ভবতা, পামরৈরপি বিদিত ইত্যাহ জনৈঃ শ্রুত ইতি৷ শ্রুতঃ অবধৃতঃ৷ "শ্রুতং শাস্ত্রাবধৃতযোঃ" ইত্যমরঃ৷ তাটকাতাটকেযবধবিশ্বামিত্রাধ্বরত্রাণাহল্যাশাপবিমোক্ষহরধনুর্ভঙ্গপরশুরামনিগ্রহসপ্ততালবেধবালিবধসিন্ধুবন্ধমূলবলনিবর্হণাদিভিরবধারিতনারাযণভাব ইত্যর্থঃ৷ য এবম্ভূতঃ স এব নিযতাত্মা স এব মহাবীর্য্য ইত্যেবং প্রতিপদং বক্ষ্যমাণং তত্পদমনুষজ্যতে৷ রামরূপেণাবতীর্ণো বিষ্ণুরেব বেদান্তোদিততত্তদ্গুণক ইতি সর্বত্র তাত্পর্যার্থঃ৷ আদৌ স্বরূপনিরূপকধর্ম্মানাহ নিযতাত্মেত্যাদিনা৷ নিযতাত্মা নিযতস্বভাবঃ, নির্বিকার ইতি যাবত্৷ "নাস্য জরযৈতজ্জীর্যতে ন বধেনাস্য হন্যতে অপহতপাপ্মা বিজরো বিমৃত্যুর্বিশোকো বিজিযত্সোপিপাসঃ" ইত্যাদিশ্রুতেঃ৷ মহাবীর্যঃ অচিন্ত্যবিবিধবিচিত্রশক্তিকঃ৷ "পরাস্য শক্তির্বিবিধৈব শ্রূযতে স্বাভাবিকী জ্ঞানবলক্রিযা চ" ইতি শ্রুতেঃ৷ দ্যুতিমান্ স্বাভাবিকপ্রকাশবান্৷ স্বযম্প্রকাশঃ জ্ঞানস্বরূপ ইতি যাবত্৷ "বিজ্ঞানঘন এব প্রজ্ঞানঘনঃ" ইতি শ্রুতেঃ৷ ধৃতিমান্ নিরতিশযানন্দঃ৷ "ধৃতিস্তু তুষ্টিঃ সন্তোষঃ" ইতি বৈজযন্তী৷ "আনন্দো ব্রহ্ম" ইতি শ্রুতেঃ৷ সর্বং জগদ্বশেস্যাস্তীতি বশী, সর্বস্বামীত্যর্থঃ৷ "সর্বস্য বশী সর্বস্যেশানঃ" ইতি শ্রুতেঃ ৷৷ 1.1.8 ৷৷



বুদ্ধিমান্নীতিমান্ বাগ্গ্মী শ্রীমান্ শত্রুনিবর্হণঃ ৷

বিপুলাংসো মহাবাহুঃ কম্বুগ্রীবো মহাহনুঃ ৷৷ 1.1.9 ৷৷

অথ সৃষ্ট্যুপযোগিগুণানাহ- বুদ্ধিমানিত্যাদিনা ৷ বুদ্ধিমান্ সর্বজ্ঞঃ ৷ "যঃ সর্বজ্ঞঃ সর্ববিত্" ইতি শ্রুতেঃ ৷ নীতিমান্ মর্যাদাবান্ ৷ শ্রুতিরত্র "ধাতা যথাপূর্বমকল্পযত্ ৷ এষ সেতুর্বিধরণ এষাং লোকানামসম্ভেদায" ইতি ৷ শোভনা বাগস্যাস্তীতি বাগ্গ্মী ৷ "বাচো গ্মিনিঃ" ইতি গ্মিনিপ্রত্যযঃ ৷ কুত্বে জশ্ত্বে চ কৃতে গকারলাভাত্ পুনর্গকার উক্তিশোভনত্বজ্ঞাপনাযেতি ন্যাসকারঃ ৷ সর্ববেদপ্রবর্ত্তক ইত্যর্থঃ ৷ "যো ব্রহ্মাণং বিদধাতি পূর্বং যো বৈ বেদাংশ্চ প্রহিণোতি তস্মৈ" ইতি শ্রুতিঃ ৷ শ্রীমান্ সমৃদ্ধোভযবিভূত্যৈশ্বর্যঃ ৷ "শ্রীঃ কান্তিসম্পদোর্লক্ষ্ম্যাম্" ইতি বাণঃ ৷ "সর্বমিদমভ্যাত্তঃ" ইতি শ্রুতিঃ ৷ শত্রূন্ তদ্বিরোধিনো নিবর্হযতি নাশযতীতি শত্রুনিবর্হণঃ ৷ "বর্হ হিংসাযাম্" ইত্যস্মাদ্ধাতোঃ কর্ত্তরি ল্যুট্ ৷ "এষ ভূতপতিরেষ ভূতপালঃ" ইতি শ্রুতেঃ ৷ অথ "য এষো ন্তরাদিত্যে হিরণ্মযঃ পুরুষো দৃশ্যতে হিরণ্যশ্মশ্রুর্হিরণ্যকেশঃ আপ্রণখাত্সর্ব এব সুবর্ণস্তস্য যথা কপ্যাসং পুণ্ডরীকমেবমক্ষিণী ৷ তস্যোদিতি নাম স এষ সর্বেভ্যঃ পাপ্মভ্য উদিত উদেতি হ বৈ সর্বেভ্যঃ পাপ্মভ্যো য এবং বেদ " ইত্যন্তরাদিত্যবিদ্যোদিতং সর্বাঙ্গসুন্দরবিগ্রহং দর্শযতি- বিপুলাংস ইত্যাদিনা সার্দ্ধশ্লোকদ্বযেন ৷ বিপুলাংসঃ উন্নতস্কন্ধঃ ৷ উন্নতস্কন্ধত্বং চ মহাপুরুষলক্ষণমিতি সামুদ্রিকোক্তম্- "কক্ষঃ কুক্ষিশ্চ বক্ষশ্চ ঘ্রাণঃ স্কন্ধো ললাটিকা ৷ সর্বভূতেষু নির্দ্দিষ্টা উন্নতাস্তু সুখপ্রদাঃ ৷৷" ইতি৷ মহাবাহুঃ বৃত্তপীবরবাহুঃ৷ আযতত্বং তু বক্ষ্যতি আজানুবাহুরিতি৷ "আজানুলম্বিনৌ বাহূ বৃত্তপীনৌ মহীশ্বরঃ" ইতি সামুদ্রিকলক্ষণম্৷ কম্বুগ্রীবঃ শঙ্খতুল্যকণ্ঠঃ৷ ইন্দুমুখীতিবত্ শাকপার্থিবাদিত্বান্মধ্যমপদলোপী সমাসঃ৷ "কম্বুগ্রীবশ্চ নৃপতির্লম্বকর্ণোতিভূষণঃ" ইতি লক্ষণম্৷ "রেখাত্রযান্বিতা গ্রীবা কম্বুগ্রীবেতি কথ্যতে" ইতি হলাযুধঃ৷ মহত্যৌ হনূ যস্যাসৌ মহাহনুঃ৷ "স্ত্রিযাঃ পুংবত্" ইত্যাদিনা পুংবদ্ভাবঃ৷ হনুঃ কপোলোপরিভাগঃ৷ "অধস্তাচ্চিবুকং গণ্ডৌ কপোলৌ তত্পরো হনুঃ" ইত্যমরঃ৷ "মাংসলৌ তু হনূ যস্য ভবতস্ত্বীষদুন্নতৌ৷ স নরো মৃষ্টমশ্নাতি যাবদাযুঃ সুখান্বিতঃ ৷৷" ইতি লক্ষণম্ ৷৷ 1.1.9 ৷৷



মহোরস্কো মহেষ্বাসো গূঢজত্রুররিন্দমঃ ৷

আজানুবাহুঃ সুশিরাঃ সুললাটঃ সুবিক্রমঃ ৷৷ 1.1.10 ৷৷

মহোরস্ক ইতি ৷ মহদ্বিশালমুরো যস্যাসৌ মহোরস্কঃ ৷ "উরঃপ্রভতিভ্যঃ কপ্" ইতি কপ্ ৷ লক্ষণং তু- "স্থিরং বিশালং কঠিনমুন্নতং মাংসলং সমম্ ৷ বক্ষোযস্য মহীপালস্তত্সমো বা ভবেন্নরঃ ৷৷" ইতি৷ মাংসলত্বং তু বক্ষ্যতি- পীনবক্ষা ইতি৷ মহান্ ইষ্বাসো ধনুর্যস্যাসৌ মহেষ্বাসঃ৷ অনেন তদুচিতসংহননবিশেষো লক্ষ্যতে, অতো ন প্রক্রমবিরোধঃ৷ গূঢে মাংসলত্বেনাপ্রকাশে জত্রুণী অসংদ্বযসন্ধিগতাস্থিনী যস্যাসৌ গূঢজত্রুঃ৷ "স্কন্ধো ভুজশিরোসোস্ত্রী সন্ধী তস্যৈব জত্রুণী" ইত্যমরঃ৷ "বিষমৈর্জত্রুভির্নিঃস্বা অতিসূক্ষ্মৈশ্চ মানবাঃ৷ উন্নতৈর্ভোগিনো নিম্নৈর্নিঃস্বাঃ পীনৈর্নরাধিপাঃ ৷৷" ইতি লক্ষণম্ ৷ অরীন্ দমযতি নিবর্ত্তযতীত্যরিন্দমঃ ৷ "সঞ্জ্ঞাযাং ভৃতৃ়বৃজিধারিসহিতপিদমঃ" ইতি খচ্ ৷ অসঞ্জ্ঞাযামপ্যার্ষঃ ৷ অরিশব্দেন পাপ্মা বিবক্ষিতঃ, অপহতপাপ্মেত্যর্থঃ ৷ অনেনাযং বিগ্রহপরিগ্রহো ন কর্মমূলঃ, কিন্ত্বনুগ্রহমূলঃ, "ইচ্ছাগৃহীতাভিমতোরুদেহঃ" ইতি স্মৃতেঃ ৷ অতঃ ন প্রক্রমভঙ্গঃ ৷ জানু ঊরুপর্ব, তত্পর্যন্তং বিলম্বিবাহুরাজানুবাহুঃ ৷ সুষ্ঠু সমং বৃত্তং ছত্রাকারং শিরো যস্যাসৌ সুশিরাঃ ৷ "সমবৃত্তশিরাশ্চৈব ছত্রাকারশিরাস্তথা ৷ একছত্রাং মহীং ভুঙ্ক্তে দীর্ঘমাযুশ্চ জীবতি ৷৷" ইতি লক্ষণম্৷ সুললাটঃ৷ ললাটসৌষ্ঠবং প্রোক্তম্- "অর্ধচন্দ্রনিভং তুঙ্গং ললাটং যস্য স প্রভুঃ" ইতি৷ শোভনঃ বিক্রমঃ পদবিক্ষেপো যস্যাসৌ সুবিক্রমঃ, শোভনত্বং চ গজাদিতুল্যত্বম্৷ তথোক্তং জগদ্বল্লভাযাম্- "সিংহর্ষভগজব্যাঘ্রগতযো মনুজা মুনে৷ সর্বত্র সুখমেধন্তে সর্বত্র জযিনঃ সদা ৷৷" ইতি ৷৷ 1.1.10 ৷৷



সমঃ সমবিভক্তাঙ্গঃ স্নিগ্ধবর্ণঃ প্রতাপবান্ ৷

পীনবক্ষা বিশালাক্ষো লক্ষ্মীবান্ শুভলক্ষণঃ ৷৷ 1.1.11 ৷৷

সমঃ নাতিদীর্ঘো নাতিহ্রস্বঃ ৷ তথাত্বং চ তত্রৈবোক্তম্- "ষণ্ণবত্যঙ্গুলোচ্ছ্রাযঃ সার্বভৌমো ভবেন্নৃপঃ" ইতি ৷ সমানি অন্যূনাধিকপরিমাণানি বিভক্তানি অশ্লিষ্টানি অঙ্গানি করচরণাদ্যবযবা যস্য স সমবিভক্তাঙ্গঃ ৷ তানি চোক্তানি সামুদ্রিকৈঃ- "ভ্রুবৌ নাসাপুটে নেত্রে কর্ণাবোষ্ঠৌ চ চূচুকৌ ৷ কূর্পরৌ মণিবন্ধৌ চ জানুনী বৃষণৌ কটী ৷ করৌ পাদৌ স্ফিজৌ যস্য সমৌ জ্ঞেযঃ স ভূপতিঃ ৷৷" ইতি৷ স্নিগ্ধঃ স্নেহযুক্তো বর্ণো যস্য সঃ স্নিগ্ধবর্ণঃ৷ তত্রোক্তং বররুচিনা "নেত্রস্নেহেন সৌভাগ্যং দন্তস্নেহেন ভোজনম্৷ ত্বচঃ স্নেহেন শয্যা চ পাদস্নেহেন বাহনম্" ইতি৷ প্রতাপবান্ তেজস্বী, সমুদাযশোভাসম্পন্ন ইত্যর্থঃ৷ পীনবক্ষা মাংসলবক্ষাঃ৷ বিশালে পদ্মপত্রাযতে অক্ষিণী যস্য সঃ বিশালাক্ষঃ৷ "বহুব্রীহৌ সক্থ্যক্ষ্ণোঃ স্বাঙ্গাত্ষচ্" ইতি ষচ্৷ অত্র সামুদ্রিকম্- "রক্তান্তৈঃ পদ্মপত্রাভৈর্লোচনৈঃ সুখভোগিনঃ" ইতি৷ লক্ষ্মীবান্ অবযবশোভাযুক্তঃ৷ শুভলক্ষণঃ অনুক্তসকললক্ষণসম্পন্নঃ ৷৷ 1.1.11 ৷৷



ধর্ম্মজ্ঞঃ সত্যসন্ধশ্চ প্রজানাং চ হিতে রতঃ ৷

যশস্বী জ্ঞানসম্পন্নঃ শুচির্বশ্যঃ সমাধিমান্ ৷

প্রজাপতিসমঃ শ্রীমান্ ধাতা রিপুনিষূদনঃ ৷৷ 1.1.12 ৷৷

এবমাশ্রিতানুভাব্যদিব্যমঙ্গলবিগ্রহশালিত্বমুক্ত্বা আশ্রিতরক্ষণোপযোগিগুণানাহ- ধর্মজ্ঞ ইত্যাদিনা স্বজনস্য চ রক্ষিতেত্যন্তেন ৷ ধর্মং শরণাগতরক্ষণরূপং জানাতীতি ধর্ম্মজ্ঞঃ ৷ বক্ষ্যতি- "মিত্রভাবেন সম্প্রাপ্তং ন ত্যজেযং কথঞ্চন ৷ দোষো যদ্যপি তস্য স্যাত্সতামেতদগর্হিতম্ ৷৷" ইতি৷ সত্যা সন্ধা প্রতিজ্ঞা যস্য স সত্যসন্ধঃ৷ "প্রতিজ্ঞানে বধৌ সন্ধা" ইতি বৈজযন্তী৷ "অপ্যহং জীবিতং জহ্যাং ত্বাং বা সীতে সলক্ষ্মণাম্৷ নহি প্রতিজ্ঞাং সংশ্রুত্য ব্রাহ্মণেভ্যো বিশেষতঃ ৷৷" ইতি ৷ প্রজানাং প্রাণিনাং হিতে হিতকরণে রতঃ তত্পরঃ ৷ যশস্বী আশ্রিতরক্ষণৈককীর্ত্তিঃ ৷ "তস্য নাম মহদ্যশঃ" ইতি শ্রুতেঃ ৷ জ্ঞানসম্পন্নঃ "যঃ সর্বজ্ঞঃ সর্ববিত্" ইত্যুক্তরীত্যা স্বরূপতঃ স্বভাবতশ্চ সর্ববিষযজ্ঞানশীলঃ ৷ শুচিঃ পাবনঃ পরিশুদ্ধো বা, ঋজুরিতি যাবত্ ৷ বশ্যঃ বশঙ্গতঃ ৷ "বশং গতঃ" ইতি নিপাতনাদ্যত্ ৷ আশ্রিতপরতন্ত্র ইত্যর্থঃ ৷ সমাধিমান্ সমাধিঃ আশ্রিতরক্ষণচিন্তা, তদ্বান্ ৷ প্রজাপতিসমঃ "মধ্যে বিরিঞ্চিগিরিশং প্রথমাবতারঃ" ইত্যুক্তরীত্যা জগদ্রক্ষণায প্রজাপতিতুল্যতযাবতীর্ণঃ ৷ শ্রীমান্ পুরুষকারভূতযা লক্ষ্ম্যা অবিনাভূতঃ ৷ ধাতা পোষকঃ ৷ "ডুধাঞ্ ধারণপোষণযোঃ" ইতি ধাতোস্তৃচ্ ৷ রিপূন্ শত্রূন্ নিষূদযতি নিরস্যতীতি রিপুনিষূদনঃ ৷ "সূদদীপদীক্ষশ্চ" ইতি প্রতিষেধস্যানিত্যত্বাত্ "অনুদাত্তেতশ্চ হলাদেঃ" ইতি যুচ্, নন্দ্যাদিপাঠাদ্বা ল্যুঃ ৷ সুষামাদিত্বাত্ ষত্বম্ ৷ আশ্রিতবিরোধিনিরসনশীল ইত্যর্থঃ ৷৷ 1.1.12 ৷৷



রক্ষিতা জীবলোকস্য ধর্মস্য পরিরক্ষিতা ৷

রক্ষিতা স্বস্য ধর্মস্য স্বজনস্য চ রক্ষিতা ৷৷ 1.1.13 ৷৷

অথাবতারৈকান্তান্ গুণানাহ- রক্ষিতেতি ৷ লোকে সার্বভৌমঃ স্বকীযজনরক্ষণ এব যততে, অযং তু ন তথা, কিন্তু সর্বস্য প্রাণিজাতস্য রক্ষিতা ৷ তাচ্ছীল্যে তৃচ্ ৷ শেষে ষষ্ঠী ৷ ননু যদি সর্বেষাং রক্ষিতা তর্হি দুষ্কৃতিনমপি সুখিনমাপাদযেদিত্যত্রাহ- ধর্মস্য পরিরক্ষিতেতি ৷ আচরণপ্রচারণাভ্যাং সর্বধর্মস্য ব্যবস্থাপযিতা ৷ উচ্ছাস্ত্রপ্রবর্ত্তিনো পি চিকিত্সকন্যাযেন অনঘ(অলঙ্ঘ)যিতেত্যর্থঃ ৷ স্বস্য স্বকীযস্য শরণাগতরক্ষণরূপস্য ধর্মস্য বিশেষধর্মস্য বিশিষ্যরক্ষিতা ৷ যদ্বা, ধর্মস্য তত্তদ্বর্ণাশ্রমধর্মস্য নিত্যং সমন্ততো রক্ষিতা ৷ লোকে সর্বধর্মপ্রবর্ত্তকো পি "ধর্মোপদেশসমযে জনাঃ সর্বে পি পণ্ডিতাঃ ৷

তদনুষ্ঠানসমযে মুনযো পি ন পণ্ডিতাঃ ৷৷" ইতি ন্যাযেন স্বধর্মানুষ্ঠানে স্খলতি, ন তথাযমিত্যাহ- স্বস্য ধর্মস্য রক্ষিতা, স্বাসাধারণস্য ক্ষত্রিযধর্মস্য রক্ষিতেত্যর্থঃ৷ লোকে সর্বরক্ষকোপি কশ্চিত্স্বজনরক্ষণং কর্ত্তুং ন প্রগল্ভতে৷ "দাস্যমৈশ্বর্য্যভাবেন জ্ঞাতীনাং চ করোম্যহম্৷ অর্ধভোক্তা চ ভোগানাং বাগ্দুরুক্তানি চ ক্ষমে ৷৷" ইতি ভগবতাপ্যুক্তেঃ ৷ তদপি কর্তুমীহত ইত্যাহ স্বজনস্য চ রক্ষিতেতি ৷ স্বজনস্য চ, স্বজনস্যাপীত্যর্থঃ ৷ অনেন স্বজনরক্ষণস্য দুর্ঘটত্বং সূচিতম্ ৷ যদ্বা, চস্ত্বর্থঃ ৷ স্বজনস্য শরণাগতস্য বিশেষেণ রক্ষিতা ৷ বিশেষস্তু তদপরাধসহিষ্ণুত্বম্ ৷ বক্ষ্যতি- "মিত্রভাবেন সম্প্রাপ্তং ন ত্যজেযং কথঞ্চন ৷ দোষো যদ্যপি তস্য স্যাত্সতামেতদগর্হিতম্ ৷৷" ইতি৷ যদ্বা, লোকে কশ্চিত্সর্বান্ রক্ষন্ স্বজনং পীডযতি, অসৌ তু স্বজনস্যাপি রক্ষিতেত্যর্থঃ৷ অথবা স্বাবতারপ্রযোজনমাহ রক্ষিতেতি৷ গীতং হি- "পরিত্রাণায সাধূনাং বিনাশায চ দুষ্কৃতাম্৷ ধর্মসংস্থাপনার্থায সম্ভবামি যুগে যুগে ৷৷" ইতি ৷ স্বজনস্য স্বশেষভূতস্যেতি সর্বলোকবিশেষণং রক্ষণহেতুসম্বন্ধদ্যোতনার্থম্ ৷ রক্ষিতা ইষ্টপ্রাপকঃ, অনেন সাধুপরিত্রাণমুক্তম্ ৷ চশব্দো ন্বাচযে ৷ রক্ষিতা চ অনিষ্টনিবর্ত্তকঃ ৷ অনেনানুষঙ্গিকদুষ্কৃদ্বিনাশ উক্তঃ ৷ ধর্মস্য সামান্যবিশেষরূপস্য স্থাপনমাহেতরবাক্যদ্বযেন ৷ রক্ষিতা স্বস্য ধর্মস্য সীতাপরিণযমুখেন স্বাশ্রমোচিতধর্মাণামনুষ্ঠাতা ৷ যদ্বা, স্বস্য ধর্মঃ পরত্বম্, তস্য রক্ষিতা ৷ হরধনুর্ভঙ্গপরশুরামজযাদিনা হি পরত্বং স্থাপিতম্ ৷ যদ্বা, ধর্মো ধনুঃ- "স্বাম্যস্বভাবসুকৃতেষ্বস্ত্রী ধর্মং তু কার্মুকে ৷" ইতি বাণঃ ৷ সদা ধনুর্দ্ধরঃ ৷ স্বজনস্য চ রক্ষিতা স্বভূতো জনঃ স্বজনঃ জ্ঞানী "জ্ঞানী ত্বাত্মৈব মে মতম্' ইতি গীতত্বাত্, তস্য রক্ষিতা; আত্মন ইব সর্বযোগক্ষেমাবহ ইত্যর্থঃ ৷৷ 1.1.13 ৷৷



বেদবেদাঙ্গতত্ত্বজ্ঞো ধনুর্বেদে চ নিষ্ঠিতঃ ৷

সর্বশাস্ত্রার্থতত্ত্বজ্ঞঃ স্মৃতিমান্ প্রতিভানবান্ ৷৷ 1.1.14 ৷৷

অথাস্যাষ্টাদশবিদ্যাস্থানাভিজ্ঞত্বমাহ- বেদেতি ৷ বিদন্ত্যনেন ধর্মাদিকমিতি বেদঃ ৷ করণে ঘঞ্ ৷ স চতুর্বিধঃ ৷ ঋগ্যজুঃসামাথর্বণভেদাত্ ৷ বেদস্য কিঞ্চিত্করাণি বেদাঙ্গানি তানি চ ষট্ ৷ তথোক্তম্- "শিক্ষা কল্পো ব্যাকরণং নিরুক্তং জ্যোতিষাং গতিঃ ৷ ছন্দসাং বিচিতিশ্চেতি ষডঙ্গানি প্রচক্ষতে ৷৷" ইতি৷ তত্র শিক্ষানাম- অকারাদীনাং বেদবর্ণানাং স্থানকরণপ্রযত্নস্বরাদিবোধিকা, যাগক্রিযাক্রমোপদেশঃ কল্পঃ, সাধুশব্দব্যাখ্যানং ব্যাকরণম্ "বর্ণাগমো বর্ণলোপো বর্ণবিপর্যযঃ" ইত্যাদিনা নিশ্চযেনোক্তং নিরুক্তম্, কর্মানুষ্ঠানকালাদিপ্রতিপাদকং শাস্ত্রং জ্যৌতিষম্, ছন্দসাং পদ্যানাং শাস্ত্রং ছন্দোবিচিতিঃ৷ বেদাশ্চ বেদাঙ্গানি চ বেদবেদাঙ্গানি তেষাং তত্ত্বং তত্ত্বার্থঃ তং জানাতীতি তথোক্তঃ৷ "ইগুপধজ্ঞাপ্রীকিরঃ কঃ" ইতি কপ্রত্যযঃ৷ ধনুর্বেদো নাম- ধনুর্হস্তমুষ্টিস্থিতিবিশেষাকর্ষণবিমোক্ষণদিব্যাস্ত্রাদিপ্রযোগপ্রতিপাদকো গ্রন্থঃ৷ চকার ইতরোপবেদসমুচ্চযার্থঃ৷ ক্ষত্রিযো ধনুর্বেদপ্রধান ইতি তস্য নির্দ্দেশঃ৷ তে চোপবেদাশ্চত্বারঃ৷ তথাহি- "আযুর্বেদো ধনুর্বেদো বেদো গান্ধর্ব এব চ৷ অর্থশাস্ত্রমিতি প্রোক্তমুপবেদচতুষ্টযম্ ৷৷" ইতি ৷ আযুর্বেদো বাহটং বৈদিকধর্মানুষ্ঠানবিরোধিরোগনিবর্ত্তকৌষধাদিপ্রতিপাদকম্ ৷ গান্ধর্ববেদো ভরতশাস্ত্রং সামগানোপযোগি ৷ অর্থশাস্ত্রং চাণক্যাদিপ্রণীতং নীতিশাস্ত্রং কর্মানুষ্ঠানেষূপযোগ্যর্থসাধনম্, তেষু নিষ্ঠিতঃ ৷ সর্বশাস্ত্রার্থতত্ত্বজ্ঞ ইতি ৷ সর্বশাস্ত্রাণি উপাত্তব্যতিরিক্তানি উপাঙ্গানি গোবলীবর্দন্যাযাত্ ৷ "ধর্মশাস্ত্রং পুরাণং চ মীমাংসান্বীক্ষিকী তথা ৷ চত্বার্যেতান্যুপাঙ্গনি শাস্ত্রজ্ঞাঃ সম্প্রচক্ষতে ৷৷" ইতি৷ তত্র ধর্মশাস্ত্রং পূর্বকাণ্ডোপবৃংহণম্, পুরাণং বেদান্তোপবৃংহণম্, ন্যাযমীমাংসে সর্ববেদসাধারণ্যৌ তেষামর্থতত্ত্বম্ অর্থযাথাত্ম্যম্, নিগূঢাশযমিত্যর্থঃ৷ তত্ জানাতীতি তথা৷ অষ্টাদশবিদ্যাস্থানতত্ত্বজ্ঞ

ইত্যর্থঃ ৷ স্মৃতিমান্ জ্ঞাতার্থবিষযে বিস্মরণলেশরহিতঃ ৷ প্রতিভানবান্ ব্যবহারকালে শ্রুতস্যাশ্রুতস্য বা ঝটিতি স্ফুরণং প্রতিভানম্, তদ্বান্ ৷৷ 1.1.14 ৷৷



সর্বলোকপ্রিযঃ সাধুরদীনাত্মা বিচক্ষণঃ ৷

সর্বদাভিগতঃ সদ্ভিঃ সমুদ্র ইব সিন্ধুভিঃ ৷৷ 1.1.15 ৷৷

অথ সর্বদা সদুপাস্যত্বমাহ- সর্বেতি ৷ সর্বে লোকাঃ প্রিযা যস্য সঃ সর্বলোকপ্রিযঃ, সর্বেষাং লোকানাং প্রিযঃ সর্বলোকপ্রিযঃ ৷ সর্বলোকপ্রিযত্বাত্ সদ্ভিরভিগন্তব্য ইত্যর্থঃ ৷ সাধুঃ তত্কার্যসাধকঃ ৷ উণ্ প্রত্যযঃ ৷ যদ্বা সাধুঃ উচিতঃ, সদভিগমনোচিত ইত্যর্থঃ ৷ "সাধুস্ত্রিষূচিতে সৌম্যে সজ্জনে বার্ধুষাবপি" ইতি বৈজযন্তী ৷ অদীনাত্মা অকার্প্পণ্যাত্মা ৷ অতিগম্ভীরপ্রকৃতিরিতি যাবত্ ৷ বিচষ্ট ইতি বিচক্ষণঃ ৷ নন্দ্যাদিত্বাত্ ল্যুঃ "অস্যুস্যনেচক্ষিডঃ খ্যাঞ্ নেতি বাচ্যম্" ইতি ব্খ্যাঞাদেশাভাবঃ ৷ বিবিধং বক্তীত্যর্থঃ ৷ অত এব সর্বদা সদুপাস্যমানত্বমাহ সর্বদেতি ৷ সর্বদা অস্ত্রাভ্যাসকালেষ্বপি সদ্ভিঃ সত্পুরুষৈঃ অভিগতঃ পরিগতঃ, পরিবারিত ইত্যর্থঃ ৷ কথমিব ? সমুদ্রঃ সিন্ধুভিরিব নদীভিরিব ৷ "স্ত্রী নদ্যাং না নদে সিন্ধুর্দেশভেদে ম্বুধৌ গজে ৷" ইতি বৈজযন্তী ৷ সর্বদাভিগতঃ সদ্ভিঃ খুরলীকেলিশ্রমবিশ্রান্ত একান্তে ছাযামবগাহমানে রামে সন্তঃ সর্বে তত্তদর্থবিশেষশ্রবণায পরিবৃত্ত্য স্থিতা ইত্যর্থঃ ৷ তথা চ বক্ষ্যতি- "জ্ঞানবৃদ্ধৈর্বযোবৃদ্ধৈঃ শীলবৃদ্ধৈশ্চ সজ্জনৈঃ ৷ কথযন্নাস্ত বৈ নিত্যমস্ত্রযোগ্যান্তরেষ্বপি ৷৷" ইতি৷ অস্ত্রযোগ্যোস্ত্রাভ্যাসঃ৷ সমুদ্র ইব সিন্ধুভিঃ৷ এবং সদভিগমনং ন রামস্যাজ্ঞাতজ্ঞাপনায, তস্য স্বত এব পূর্ণত্বাত্৷ কিন্তু স্বেষামেবাপূর্বার্থবিশেষলাভায, গত্যন্তরাভাবাদিতি ভাবঃ৷ সিন্ধবো হি স্বসত্তালাভাযৈব সমুদ্রমভিযান্তি, ন তু তস্যাতিশযাপাদনায ৷৷ 1.1.15 ৷৷



আর্যঃ সর্বসমশ্চৈব সদৈকপ্রিযদর্শনঃ ৷

স চ সর্বগুণোপেতঃ কৌসল্যানন্দবর্দ্ধনঃ ৷৷ 1.1.16 ৷৷

এবমভিগমনহেতুভূতং সৌলভ্যাদিকং বিশদযতি- আর্য ইতি ৷ আঙ্পূর্বাত্ 'ঋ গতৌ' ইত্যস্মাদ্ধাতোঃ কর্মণি ণ্যত্প্রত্যযঃ ৷ অভিগন্তুমর্হ ইত্যর্থঃ ৷ কিং সতামেব ? নেত্যাহ- সর্বসমঃ, জাতিগুণবৃত্ত্যাদিতারতম্যং বিনা সর্বেষামাশ্রযণীযত্বে তুল্যঃ ৷ অস্য কাদাচিত্কত্বং বারযত্যেবকারঃ ৷ চকার উক্তসমুচ্চযার্থঃ ৷ কিঞ্চিদুপদেশাভাবে পি সৌন্দর্যাদভিগন্তব্যত্বমাহ সদৈকপ্রিযদর্শন ইতি ৷ সদানুভবে পি নবনবতযা ভাসমান ইত্যর্থঃ ৷ অথ "ইষুক্ষযান্নিবর্ত্তন্তে নান্তরিক্ষক্ষিতিক্ষযাত্ ৷ মতিক্ষযান্নিবর্তন্তে ন গোবিন্দগুণক্ষযাত্ ৷৷" ইতি ভগবদ্গুণানাং বর্ষাযুতেনাপি বর্ণযিতুমশক্যত্বেন সঙ্গ্রহেণ বদন্নুত্তরমুপসংহরতি- স চেতি৷ কোসলস্য রাজ্ঞোপত্যং স্ত্রী কৌসল্যা৷ "বৃদ্ধেত্কোসলাজাদাঞ্ঞ্যঙ্" ইতি ঞ্যঙ্প্রত্যযঃ৷ "যঙশ্চাপ্" ইতিচাপ্৷ তস্যা আনন্দং বর্দ্ধযতীতি কৌসল্যানন্দবর্দ্ধনঃ৷ চশব্দ এবকারার্থঃ৷ কৌসল্যাসুতত্বেনাবতীর্ণো বিষ্ণুরেব বেদান্তোদিতসকলগুণসম্পন্নঃ পরমাত্মা, ন তু ব্রহ্মাদিষ্বন্যতম ইত্যর্থঃ৷ দশরথনন্দন ইত্যনুক্তিঃ পুত্রলাভফলস্য কৌসল্যযৈব লাভাত্৷ অত এব বক্ষ্যতি- "কৌসল্যা লোকভর্ত্তারং সুষুবে যং মনস্বিনী" ইতি ৷৷ 1.1.16 ৷৷



সমুদ্র ইব গাম্ভীর্য্যে ধৈর্যেণ হিমবানিব ৷

বিষ্ণুনা সদৃশো বীর্যে সোমবত্প্রিযদর্শনঃ ৷৷ 1.1.17 ৷৷

অথাস্য নিস্সমাভ্যধিকত্বং বক্তুং লোকে প্রকৃষ্টবস্তূনাং তদেকৈকগুণসাম্যমাহ- সমুদ্র

ইবেত্যাদিশ্লোকদ্বযেন ৷ গাম্ভীর্যং নাম- স্বান্তর্গতপদার্থাপ্রকাশকত্বম্ ৷ যথা সমুদ্রঃ স্বান্তর্গতং রত্নাদিকমপ্রকাশযন্নেব বর্ত্ততে তথাযমপি স্বীযং পরত্বমপ্রকটযন্নেবাস্ত ইত্যর্থঃ ৷ বক্ষ্যতি- "আত্মানং মানুষং মন্যে" ইতি ৷ ধৈর্যং নাম- শোকহেতুসদ্ভাবে পি নিঃশোকত্বম্ ৷ তেন হিমবানিব হিমবত্সদৃশঃ ৷ "গিরযো বর্ষধারাভির্হন্যমানা ন বিব্যথুঃ ৷ অভিভূযমানা ব্যসনৈর্যথাধোক্ষজচেতসঃ ৷৷" ইতি হ্যুক্তম্৷ অত্র বস্তুতঃ সমুদ্রাদেরুপমানত্বাভাবেপি প্রতিপত্তৃ়ণামুপমানত্বং সম্ভবতীত্যেবমুক্তম্৷ যথা "ইষুবদ্গচ্ছতি সবিতা" ইত্যত্র৷ বিষ্ণুনেতি৷ বীর্যে বিষযে বিষ্ণুনা সদৃশঃ৷ বিষ্ণোরর্ধত্বেন রামস্য বিষ্ণুসাদৃশ্যং সুবচমেব৷ "স উ শ্রেযান্ ভবতি জাযমানঃ" ইত্যুক্তত্বেন তদংশস্যাপি তত্সদৃশত্বং যুক্তমেব৷ সোমবত্প্রিযদর্শনঃ শোকনিবৃত্তিপূর্বকমাহ্লাদকরঃ ৷৷ 1.1.17 ৷৷



কালাগ্নিসদৃশঃ ক্রোধে ক্ষমযা পৃথিবীসমঃ ৷

ধনদেন সমস্ত্যাগে সত্যে ধর্ম ইবাপরঃ ৷৷ 1.1.18 ৷৷

ক্রোধে কালাগ্নিসদৃশঃ, কালাগ্নিক্রোধসমক্রোধ ইত্যর্থঃ ৷ স্ববিষযাপরাধমেব স্বযং সহতে ৷ স্বাশ্রিতবিষযাপরাধকরণে তু জ্বলজ্জ্বলন ইব শীতলতরে পি হৃদযে কোপমাবহতীত্যর্থঃ ৷ জলে হি কালাগ্নির্জ্বলতি ৷ ক্ষমযা ক্ষমারূপসদৃশধর্মেণ পৃথিবীসমঃ পৃথিবীতুল্যক্ষমঃ, স্বস্মিন্নপকারকরণে অচেতনবদ্বর্ত্তত ইত্যর্থঃ ৷ "ন স্মরত্যপকারাণাং শতমপ্যাত্মবত্তযা ৷" ইতি বক্ষ্যতি ৷ ত্যাগে ত্যাগবিষযে ধনদেন কুবেরেণ সমঃ, তদ্বদ্দাতেত্যর্থঃ ৷ কুবেরস্য ত্যাগিত্বং " ত্যাগে চ ধনদো যথা" ইত্যাদিবক্ষ্যমাণবচনশতসিদ্ধম্ ৷ ন চ তস্য লুব্ধত্বং কুতশ্চিত্সিদ্ধম্ ৷ "ত্যাগে সত্যপি ধনদবদাঢ্যঃ" ইতি ব্যাখ্যানং তু প্রক্রমবিরুদ্ধম্, ন হ্যাঢ্যত্বং কশ্চিদ্গুণঃ ৷ তথা সতি লুব্ধত্বমেবাস্য সিদ্ধং স্যাত্ ৷ সত্যে সত্যবচনে অপরঃ উত্কৃষ্টবস্ত্বন্তররহিতঃ ধর্মঃ ধর্মদেবতেব স্থিতঃ, ধর্মদেবতেব নিরপাযসত্যবচন

ইত্যর্থঃ ৷ সত্যে অপরো ধর্ম ইব স্থিত ইতি ব্যাখ্যানে প্রকৃতৌপম্যে বিরোধঃ, তস্যোত্প্রেক্ষারূপত্বাত্ ৷ ক্বচিদুপমা ক্বচিদুল্লেখঃ ক্বচিদুত্প্রেক্ষেতি বিজাতীযসঙ্কর ইত্যপ্যাহুঃ ৷৷ 1.1.18 ৷৷



তমেবঙ্গুণসম্পন্নং রামং সত্যপরাক্রমম্ ৷

জ্যেষ্ঠং শ্রেষ্ঠগুণৈর্যুক্তং প্রিযং দশরথঃ সুতম্ ৷৷ 1.1.19 ৷৷

এংব বেদান্তোদিতজগত্কারণত্বসর্বজ্ঞত্বসর্বশক্তিত্বসর্বান্তর্যামিত্বপ্রমুখসমস্তকল্যাণগুণাকরং ব্রহ্ম কিং রামত্বেনাবতীর্ণো বিষ্ণুঃ, উত ব্রহ্মরুদ্রাদিষ্বন্যতম ইতি বাল্মীকিনা বেদোপবৃংহণায পৃষ্টে বেদান্তোদিতগুণানাং তদন্যেষ্বসম্ভবাত্তস্যৈব সম্ভবাচ্চ স এব বেদান্তোদিতং পরং তত্ত্বমিত্যুপদিষ্টম্ ৷ তত্র তত্র জগত্কারণপ্রকরণেষু প্রযুক্তাঃ স্বযম্ভূশিবাদিশব্দাঃ সদ্ব্রহ্মাদিসামান্যশব্দবদপর্যবসানবৃত্ত্যা বযববৃত্ত্যা বা পরমাত্মপরা ইত্যপ্যর্থসিদ্ধম্ ৷ এবং বেদান্তসারার্থঃ সন্দর্শিতঃ ৷ ননু ব্রহ্মস্বরূপমিব ফলস্বরূপং তদুপাযস্বরূপমপি বেদার্থত্বাদুপবৃংহণীযম্, তদুভযং কিমিতি ন পৃষ্টং নোপদিষ্টং চ ৷ মৈবম্; পরিপপ্রচ্ছেত্যত্র পরিণা তদুভযস্বরূপমপি পৃষ্টমেব ৷ উত্তরে চ "প্রজানাং চ হিতে রতঃ" ইত্যাদিনোপাযত্বং "সদৈকপ্রিযদর্শনঃ" ইত্যাদিনোপেযত্বং চ তস্যৈবেত্যুক্তম্ ৷ ননু সিদ্ধস্যৈব তস্যোপাযত্বে সর্বমুক্তিপ্রসঙ্গ ইতি চেন্ন; য উপাযোপেযাধিকারী তস্যৈব ফলং দিশতি নানধিকারিণ ইতি ব্যবস্থাপনাত্ ৷ অধিকারশ্চ তত্প্রাপ্ত্যপেক্ষাসাধনান্তরপরিত্যাগশ্চেত্যুত্তরগ্রন্থে সুব্যক্তম্ ৷ ননু বেদোপবৃংহণমিদং রামাযণমিত্যুক্তম্ ৷ ধর্মো পি বেদার্থঃ ৷ স কথং নোপবৃংহিতঃ, কিঞ্চ ইযতা গ্রন্থেন বেদান্তার্থ উপবৃংহিতঃ, কিমতঃ পরেণ গ্রন্থেন ? উচ্যতে- উক্তাননুক্তাংশ্চ কল্যাণগুণাংস্তচ্চরিত্রনিদর্শনমুখেন প্রতিপাদযিতুমুত্তরগ্রন্থঃ

পূর্বভাগোপবৃংহণং চ রামাযণপুরুষাচারমুখেন হি সামান্যধর্মো বিশেষধর্মশ্চোপবৃংহিতঃ ৷ ননু তথাপি কথং বালকাণ্ডকথা নোপদর্শিতা ? মৈবম্ ; তত্র প্রদর্শনীযগুণবিশেষাভাবাত্, ন চ সাপ্যত্যন্তমপ্রদর্শিতা ৷ "ইক্ষ্বাকুবংশপ্রভবঃ" ইত্যবতরণম্, "মহাবীর্যঃ" ইতি তাটকাতাটকেযাদিবধঃ, "ধনুর্বেদে চ নিষ্ঠিতঃ" ইতি কৌশিকাধিগতনিখিলদিব্যাস্ত্রবত্ত্বম্, "শ্রীমান্" ইতি বৈদেহীলাভশ্চেতি বালকাণ্ডকথাসূচনাত্ ৷ অথাযোধ্যাকাণ্ডকথাং প্রস্তৌতি- তমেবমিত্যাদিনা ৷ আদৌ শ্লোকদ্বযমেকান্বযম্ ৷ দশসু দিক্ষু রথো যস্য স দশরথঃ ৷ অপ্রতিহতরথত্বেন রামায রাজ্যং দত্তম্, ভীতিদত্তত্বাভাবেন পুনরনাদাতব্যত্বমুক্তম্ ৷ মহীপতিঃ অস্বামিদত্তত্বাভাব উচ্যতে ৷ এবং দাত্রদোষেণ পুনরনাহরণীযত্বমুক্ত্বা সম্প্রদানগুণেনাপ্যাহ তমিত্যাদিনা ৷ তং প্রসিদ্ধম্ ৷ এবং গুণসম্পন্নং পূর্বোক্তসর্বগুণসমৃদ্ধম্, সর্বস্য স্বামিভূতমিতি যাবত্ ৷ সত্যপরাক্রমমমোঘপরাক্রমম্, সর্বরক্ষণশক্তমিতি যাবত্ ৷ জ্যেষ্ঠং জন্মক্রমেণাপি রাজ্যার্হম্ ৷ শ্রেষ্ঠগুণৈর্যুক্তম্ নীতিশাস্ত্রোক্তষাড্গুণ্যযুক্তম্, সন্ধিবিগ্রহযানাসনদ্বৈধীভাবসমাশ্রযাঃ ষড্গুণাঃ কামন্দকোক্তাঃ ৷ প্রিযং প্রীতিবিষযম্ ৷ অনেন তাত্কালিকপ্রীতিদানব্যাবৃত্তিঃ ৷ সুতং জন্মনৈব রাজ্যার্হম্ ৷৷ 1.1.19 ৷৷



প্রকৃতীনাং হিতৈর্যুক্তং প্রকৃতিপ্রিযকাম্যযা ৷

যৌবরাজ্যেন সংযোক্তুমৈচ্ছত্প্রীত্যা মহীপতিঃ ৷৷ 1.1.20 ৷৷

প্রকৃতীনাং প্রজানাং হিতৈঃ হিতকরণৈর্যুক্তম্, অনেন সর্বানুকূল্যমুক্তম্ ৷ এবম্ভূতং রামং প্রকৃতিপ্রিযকাম্যযা অমাত্যাদীনাং প্রীতিকরণেচ্ছযা ৷ ইচ্ছাযাং কাম্যচ্প্রত্যযঃ ৷ "অপ্রত্যযাত্" ইত্যপ্রত্যযঃ ৷ "অজাদ্যতষ্টাপ্" ৷ প্রীত্যা স্বপ্রীত্যা চ ৷ চকারো র্থসিদ্ধঃ ৷ "গামশ্বং পুরুষং জগত্" ইতিবত্ ৷ মন্ত্রিবৃদ্ধৈরালোচনপূর্বকং কৃতত্বাদপ্রত্যাখ্যেযত্বমুচ্যতে ৷ "প্রকৃতিঃ পঞ্চভূতেষু স্বভাবে মূলকারণে ৷ ছন্দঃকারণগুহ্যেষু জন্মামাত্যাদিমাতৃষু" ইত্যুভযত্র বৈজযন্তী ৷ যুবা চাসৌ রাজা চ যুবরাজঃ তস্য ভাবঃ কর্ম বা যৌবরাজ্যম্ ৷ ব্রাহ্মণাদিত্বাত্ ষ্যঞ্ ৷ তেন পিতরি রাজ্যং নির্বহত্যেব সর্বনির্বাহকত্বেনাভিষিক্তঃ পুত্রো যুবরাজঃ, তস্য ভাবেনেত্যর্থঃ ৷ সংযোক্তুং ঘটযিতুমৈচ্ছত্, তত্সম্ভারান্ সমভরদিত্যর্থঃ ৷৷ 1.1.20 ৷৷



তস্যাভিষেকসম্ভারান্ দৃষ্ট্বা ভার্যাথ কৈকযী ৷

পূর্বং দত্তবরা দেবী বরমেনমযাচত ৷৷

বিবাসনং চ রামস্য ভরতস্যাভিষেচনম্ ৷৷ 1.1.21 ৷৷

এবং পুনরাদানাযোগ্যং রামায রাজ্যপ্রদানমুক্ত্বা অপরিহরণীযমনন্তরভাবি কৈকেয্যা যাচনমাহ- তস্যেতি সার্দ্ধশ্লোক একান্বযঃ ৷ অথ রামায রাজ্যপ্রদানেচ্ছানন্তরং তস্য রামস্যাভিষেকঃ কর্মবিশেষঃ, তস্য সম্ভারানুপকরণানি ৷ "ঔদুম্বর্যাসন্দী তস্যৈ প্রাদেশমাত্রাঃ পাদাঃ স্যুঃ" ইত্যাদীনি "দধিমধুসর্পিরাতপবর্ষ্যা আপঃ" ইত্যন্তানি ব্রাহ্মণোক্তানি দৃষ্ট্বা মন্থরামুখেন দর্শন ইব জ্ঞাত্বা ৷ ভার্যা ভর্তুং যোগ্যা, ন তু স্বাতন্ত্র্যার্হা ৷ পূর্বং পূর্বকালে ৷ বিভক্তিপ্রতিরূপকমব্যযম্ ৷ তেন দশরথেন দত্তবরা শম্বরাসুরবিজযকালে সারথ্যকরণপারিতোষিকতযা দত্তবরা ৷ যাচনহেতুত্বেনেদমুক্তম্ ৷ (তচ্ছব্দস্য দশরথপরামর্শিতযা শম্বরাসুরসমরং সূচিতম্ ৷ দশসু দিক্ষু অপ্রতিরুদ্ধরথো হি সঃ ৷) দীব্যতীতি দেবী ৷ পচাদ্যচ্ ৷ দেবডিতি টিত্ত্বেন পাঠাত্ ঙীপ্ ৷ ভোগোপকরণভূতেতি ব্যামোহমূলোক্তিঃ ৷ কৈকযী কেকযানাং রাজা কেকযঃ ৷ "ক্ষত্রিযসমানশব্দাজ্জনপদাত্তস্য রাজন্যপত্যবত্" ইত্যঞ্ ৷ "জনপদে লুপ্" ৷ কেকযস্যাপত্যং স্ত্রী কৈকযী ৷ "জনপদশব্দাত্ক্ষত্রিযাদঞ্" ইত্যপত্যার্থে ঞ্ ৷ "টিড্ঢাণঞ্- " ইত্যাদিনা

ঙীপ্ ৷ নন্বঞ্প্রত্যযে "কেকযমিত্রযুপ্রলযানাং যাদেরিযঃ" ইতীযাদেশঃ কিং ন স্যাত্ ? উচ্যতে- "জরাযাং জরসন্যতরস্যাম্" ইত্যতো ন্যতরস্যামিত্যনুবৃত্তেস্তস্য বৈকল্পিকত্বাত্ ৷ ন চেযাদেশাভাব আর্ষ ইতি বাচ্যম্ ৷ কৈকেযীকৈকযীতি শব্দভেদপ্রকাশিকাযামুক্তেঃ ৷ "প্রাক্ কৈকযীতো ভরতস্ততো ভূত্" ইতি ভট্টিপ্রযোগাত্ ৷ কেকযীতি পাঠে তু- কেকযান্ জন্মভূমিত্বেনাচষ্ট ইতি কেকযী ৷ "তদাচষ্টে" ইতি ণিজন্তাদৌণাদিকে স্ত্রিযামিকারপ্রত্যযে টিলোপে ণিলোপে চ কৃতে "কৃদিকারাদক্তিনঃ" ইতি ঙীষিত্যাহুঃ ৷ "পুংযোগাদাখ্যাযাম্" ইতি বা ঙীষ্ ৷ তত্র যোগশব্দেনাবিশেষাজ্জন্যজনকভাবো পি গৃহ্যতে ৷ কেকযশব্দো মূলপ্রকৃতিরেবোপচারাত্ স্ত্র্যপত্যে বর্ত্ততে ৷ শার্ঙ্গরবাদিপাঠাত্ ঙীনিতি ন্যাসকারঃ ৷ কৈকযী ৷ এনং দশরথম্ ৷ "দ্বিতীযাটৌস্স্বেনঃ" ইত্যন্বাদেশে এনাদেশঃ ৷ রামস্য বিবাসনং ভরতস্যাভিষেচনং চ বরমযাচত অর্থিতবতী ৷ যাচির্দ্বিকর্মকঃ ৷৷ 1.1.21 ৷৷



স সত্যবচনাদ্রাজা ধর্মপাশেন সংযতঃ ৷

বিবাসযামাস সুতং রামং দশরথঃ প্রিযম্ ৷৷ 1.1.22 ৷৷

স ইতি ৷৷ রাজা সর্বরঞ্জকঃ, "রাজা প্রকৃতিরঞ্জনাত্" ইতি প্রযোগাত্ ৷ ঔণাদিকঃ কনিন্প্রত্যযঃ ৷ যদ্যপি "রজকরজনরজস্সূপসঙ্খ্যানম্" ইতি বচনাদত্র নলোপপ্রসক্তির্নাস্তি তথাপি রজস্সাহচর্যাদৌণাদিকস্য তত্র গ্রহণম্ ৷ স পূর্বং রামায দত্তরাজ্যঃ, মন্ত্রিপ্রমুখৈরালোচনপূর্বকং প্রতিজ্ঞাতরামাভিষেক ইত্যর্থঃ ৷ দশরথঃ ৷ ধর্মঃ পাশ ইব ধর্মপাশঃ ৷ "উপমিতং ব্যাঘ্রাদিভিঃ" ইতি সমাসঃ ৷ ব্যাঘ্রাদেরাকৃতিগণত্বাত্ ৷ তেন সংযতো বদ্ধঃ সন্ সত্যবচনাত্ স্ত্রীবিষযবচনসিদ্ধিহেতোঃ প্রিযং সুতং বিবাসযামাস, "রামো বিগ্রহবান্ ধর্মঃ" ইত্যুক্তরীত্যা প্রথমমঙ্গীকৃতং পরমধর্মং পরিত্যজ্যানন্তরং প্রবৃত্তং স্ত্রীবিষযং ক্ষুদ্রধর্মমবলম্বিতবানিত্যর্থঃ ৷ এতেন "সাঙ্কেত্যং পারিহাস্যং বা স্তোভং হেলনমেব বা ৷ বৈকুণ্ঠনামগ্রহণমশেষাঘবিনাশনম্ ৷৷" "আক্রুশ্য পুত্রমঘবান্ যদজামিলোপি নারাযণেতি ম্রিযমাণ উপৈতি মুক্তিম্" "কামাদ্গোপ্যো ভযাত্কংসঃ" ইত্যেবং যথাকথঞ্চিত্ ভগবন্নামবতাং মুক্তিসিদ্ধৌ সর্বদা রামপরাযণস্য দশরথস্য কথং ন মুক্তিরিতি শঙ্কা দূরোত্সারিতা৷ সিদ্ধসাধনত্যাগাত্ কাশকুশাবলম্বনাত্ ধর্মপাশপ্রতিবন্ধাচ্চ মুক্তিপ্রসঙ্গাভাবাত্ ; তথা চ মুমুক্ষুণা দশরথবন্ন বর্তিতব্যমিত্যুক্তং ভবতি ৷৷ 1.1.22 ৷৷



স জগাম বনং বীরঃ প্রতিজ্ঞামনুপালযন্ ৷

পিতুর্বচননির্দেশাত্ কৈকেয্যাঃ প্রিযকারণাত্ ৷৷ 1.1.23 ৷৷

পিতৃবচনপরিপালনমবশ্যং কর্ত্তব্যম্, এতদ্রামাচারমুখেন দর্শযতি- স জগামেতি ৷ স রামঃ বীরো পি রাজ্যপরিপালনসমর্থো পি কৈকেয্যাঃ প্রিযকারণাত্ প্রীতিহেতুভূতাত্ স্ত্রীপারবশ্যেনোক্তাদপীত্যর্থঃ ৷ পিতুর্বচননির্দেশাত্, বচনমেব নির্দ্দেশঃ আজ্ঞা ৷ "আজ্ঞাযামপি নির্দেশঃ" ইতি বাণঃ ৷ তস্মাদ্ধেতোঃ প্রতিজ্ঞাং কৈকেযীসমক্ষং কৃতাং প্রতিজ্ঞামনুপালযংশ্চ ৷ "লক্ষণহেত্বোঃ ক্রিযাযাঃ" ইতি হেত্বর্থে শতৃপ্রত্যযঃ ৷ বক্ষ্যতি- "তদ্ব্রূহি বচনং দেবি রাজ্ঞো যদভিকাংক্ষিতম্ ৷ করিষ্যে প্রতিজানে চ রামো দ্বির্নাভিভাষতে" ইতি স্বপ্রতিজ্ঞাপালনার্থং পিতৃবচনপালনার্থং চেত্যর্থঃ ৷ বনং দণ্ডকাবনমুদ্দিশ্য জগাম ৷৷ 1.1.23 ৷৷



তং ব্রজন্তং প্রিযো ভ্রাতা লক্ষ্মণো নুজগাম হ ৷

স্নেহাদ্বিনযসম্পন্নঃ সুমিত্রানন্দবর্দ্ধনঃ ৷৷

ভ্রাতরং দযিতো ভ্রাতুঃ সৌভ্রাত্রমনুদর্শযন্ ৷৷ 1.1.24 ৷৷

ইক্ষ্বাকুবংশেত্যাদিনা সমস্তকল্যাণগুণপরিপূর্ণত্বোক্ত্যা পরত্বমুক্তম্ ৷ তমেবমিত্যাদিনা অভিষেকপ্রবৃত্তিনিবৃত্তিকথনাত্ সৌলভ্যমুক্তম্ ৷ অথ পরত্বসৌলভ্যানুগুণং সমাশ্রযণমাহ- তং ব্রজন্তমিতি ৷ যদ্বা অথ সিদ্ধসাধননিষ্ঠৈঃ লক্ষ্মণবত্ কৈঙ্কর্যপরৈর্ভবিতব্যমিতি ব্যঞ্জযন্নাহ তং ব্রজন্তমিতি, সার্দ্ধশ্লোক একান্বযঃ ৷ প্রীণাতীতি প্রিযঃ ৷ রামে প্রীতিমান্ ৷ "ইগুপধজ্ঞাপ্রীকিরঃ কঃ" ইতি কঃ ৷ অনেনানুগতিহেতুর্ভক্তিরুক্তা ৷ ভ্রাতা "ভ্রাতা স্বা মূর্তিরাত্মনঃ" ইতি মূর্তিভূতঃ ৷ বিনযসম্পন্নঃ কৈঙ্কর্যহেতুবিনযযুক্তঃ ৷ বিনযঃ শেষত্বজ্ঞানং রামকৈঙ্কর্য্যরূপাচারো বা ৷ "বিনযো ধর্মবিদ্যাদিশিক্ষাচারপ্রশান্তিষু" ইতি বৈজযন্তী ৷ সুমিত্রাযাঃ আনন্দং বর্দ্ধযতীতি সুমিত্রানন্দবর্দ্ধনঃ, "সৃষ্টস্ত্বং বনবাসায" "রামং দশরথং বিদ্ধি মাং বিদ্ধি জনকাত্মজাম্ ৷ অযোধ্যামটবীং বিদ্ধি গচ্ছ তাত যথাসুখম্ ৷৷" ইতি সুমিত্রযৈবোক্তত্বাত্৷ দযিতঃ রামস্যেষ্টতমঃ৷ "যমেবৈষ বৃণুতে তেন লভ্যঃ" ইত্যুক্তরীত্যা প্রিযতমত্বেন বরণীয ইত্যর্থঃ৷ লক্ষ্মণঃ কৈঙ্কর্যলক্ষ্মীসম্পন্নো ভবিষ্যতীতি জ্ঞাত্বা লক্ষ্মণ ইতি বসিষ্ঠেন কৃতনামধেযঃ, "স তু নাগবরঃ শ্রীমান্" "অন্তরিক্ষগতঃ শ্রীমান্" ইত্যুক্তেঃ৷ কৈঙ্কর্যলক্ষ্মীবত্ত্বং "লক্ষ্মণো লক্ষ্মীসম্পন্নঃ" ইতি বক্ষ্যতি৷ "লক্ষ্ম্যা অচ্চ" ইতি পামাদিগণসূত্রান্মত্বর্থীযো নপ্রত্যযঃ, অকারশ্চান্তাদেশঃ৷ "লক্ষ্মীবান্ লক্ষ্মণঃ শ্রীমান্" ইতি পর্যাযপাঠশ্চ৷ সুভ্রাতুর্ভাবঃ সৌভ্রাত্রম্৷ ভাবে অণ্, অনুশতিকাদিত্বাত্ উভযপদবৃদ্ধিঃ৷ রামং বিনা ক্ষণমপি জীবনাক্ষমত্বং সুভ্রাতৃত্বম্৷ বক্ষ্যতি- "ন চ সীতা ত্বযা হীনা ন চাহমপি রাঘব৷ মুহূর্ত্তমপি জীবাবো জলান্মত্স্যাবিবোদ্ধৃতৌ ৷৷" ইতি ৷ রামস্য লক্ষ্মণবিরহাসহত্বং সুভ্রাতৃত্বম্ ৷ তচ্চ বক্ষ্যতি- "ন চ তেন বিনা নিদ্রাং লভতে পুরুষোত্তমঃ ৷ মৃষ্টমন্নমুপানীতমশ্নাতি ন হি তং বিনা ৷৷" ইতি৷ তদনুদর্শযন্ সন্৷ যদ্বা এবং সুভ্রাতৃভির্বর্ত্তিতব্যমিতি দর্শযন্নিবেতি গম্যোত্প্রেক্ষা৷ ব্রজন্তম্ একান্তে স্বাভিমতসকলকৈঙ্কর্যপ্রধানপ্রবৃত্তং ভ্রাতরম্৷ উপলক্ষণমিদম্, "মাতা পিতা চ ভ্রাতা চ নিবাসঃ শরণং সুহৃত্৷ গতির্নারাযণঃ" ইত্যুক্তসকলবিধবন্ধুঃ৷ বক্ষ্যতি- "অহং তাবন্মহারাজে পিতৃত্বং নোপলক্ষযে৷ ভ্রাতা ভর্ত্তা চ বন্ধুশ্চ পিতা চ মম রাঘবঃ ৷৷" ইতি ৷ স্নেহাত্ "বাল্যাত্প্রভৃতি সুস্নিগ্ধো লক্ষ্মণো লক্ষ্মিবর্দ্ধনঃ" ইত্যুক্তরামভক্তেরেব হেতোরনুজগাম ৷ "যেন যেন ধাতা গচ্ছতি তেন তেন সহ গচ্ছতি" ইতিবদপূর্বো যং কশ্চিদ্বৃত্তিবিশেষ ইতি ঋষির্বিস্মযতে হেতি ৷ "হ বিস্মযে বিষাদে চ" ইতি বাণঃ ৷ আশালেশমাত্রেণ স্বস্মিন্নেবাধিকপ্রেমাণং ভগবন্তং কুত্রচিত্ একান্তস্থলে স্বমনোরথানুরূপবিশিষ্টবিষযসকলকৈঙ্কর্যলাভাযানুসরন্নধিকার্যত্র বিনির্দিশ্যতে ৷৷ 1.1.24 ৷৷



রামস্য দযিতা ভার্যা নিত্যং প্রাণসমা হিতা ৷

জনকস্য কুলে জাতা দেবমাযেব নির্মিতা ৷৷ 1.1.25 ৷৷

অথ সীতাযাঃ সাধনদশাযাং পুরুষকারতযা ফলদশাযাং প্রাপ্যতযা চান্বযাত্তযা নিত্যযোগং দর্শযতি- রামস্যেত্যাদিশ্লোকদ্বযেন ৷ রামস্যাভিরামস্যাপি দযিতা অভিরামা নিত্যং ভার্যা হৃদি সন্ততং ধার্যা ৷ বিভর্ত্তেঃ "ঋহলোর্ণ্যত্" ইতি ণ্যত্ ৷ প্রাণসমা উক্তার্থদ্বযে হেতুরযম্ ৷ হিতা চেতনহিতপরা ৷ "মিত্রমৌপযিকং কর্তুম্" ইত্যাদি বক্ষ্যতি ৷ রামহিতপরা বা ৷ বক্ষ্যতি- "স্মারযে ত্বাং ন শিক্ষযে" ইতি ৷ জনকস্য কুলে জাতা, আচারপ্রধানেত্যর্থঃ ৷ দেবমাযেব নির্মিতা ৷ অমৃতমথনানন্তরমসুরমোহনার্থং নির্মিতা বিষ্ণুমাযেব স্থিতা ৷ "মাযযা মোহযিত্বা তান্ বিষ্ণুঃ স্ত্রীরূপমাস্থিতঃ" ইত্যুক্তেঃ ৷ যদ্বা নির্মিতা কৃতমূর্তিঃ দেবমাযা বিষ্ণোরাশ্চর্যশক্তিরিব স্থিতা, অনেন সৌন্দর্যস্য পরাকাষ্ঠোক্তা ৷ অথবা নির্মিতা কৃতাবতারা ৷ দেবমাযা দেবস্য বিষ্ণোর্লক্ষ্মীঃ ৷ বক্ষ্যতি উত্তরকাণ্ডে- "ঋতে মাযাং বিশালাক্ষীং তব

পূর্বপরিগ্রহাম্" ইতি ৷ ইবশব্দো বাক্যালঙ্কারে এবকারার্থে বা ৷৷ 1.1.25 ৷৷



সর্বলক্ষণসম্পন্না নারীণামুত্তমা বধূঃ ৷

সীতাপ্যনুগতা রামং শশিনং রোহিণী যথা ৷৷ 1.1.26 ৷৷

সর্বলক্ষণসম্পন্না সামুদ্রিকোক্তৈঃ সর্বৈরুত্তমস্ত্রীলক্ষণৈঃ সম্পন্না ৷ নারীণামুত্তমা পূর্বোক্তসর্বপ্রকারেণ সর্বস্ত্রীশ্রেষ্ঠা ৷ পুরুষোত্তমরামানুরূপনার্যুত্তমেত্যর্থঃ ৷ বধূর্দশরথস্নুষা অচিরোঢা বা ৷ "অচিরোঢা বধূঃ" ইতি বৈজযন্তী ৷ সীতা- "সীতা লাঙ্গলপদ্ধতিঃ" তজ্জন্যত্বাত্তদ্ব্যপদেশঃ ৷ অনেনাযোনিজত্বোক্তের্দিব্যলোকবাসকালিকসৌন্দর্যান্যূনতোক্তা ৷ অপিশব্দনে লক্ষ্মণানুগতিঃ সমুচ্চীযতে ৷ রামমনুগতা নিরবধিকসৌন্দর্যাকৃষ্টহৃদযতযানুগতবতী, রোহিণী যথা ৷ যথাশব্দ ইবার্থঃ ৷ "যথা তথেবৈবং সাম্যে" ইত্যমরঃ ৷ রোহিণীনাম চন্দ্রস্যাসাধারণপত্নী ৷ "বরিষ্ঠা সর্বনারীণামেষা চ দিবি দেবতা ৷ রোহিণী ন বিনা চন্দ্রং মুহূর্ত্তমপি দৃশ্যতে ৷৷" ইতি৷ ন কেবলং রামসৌন্দর্যাকৃষ্টানুগতা, কিন্তু কলঙ্কিনং রোহিণীব পাতিব্রত্যস্বরূপপ্রযুক্তা গতেত্যর্থঃ৷ অযমর্থোনসূযাসমক্ষং ব্যক্তীভবিষ্যতি ৷৷ 1.1.26 ৷৷



পৌরৈরনুগতো দূরং পিত্রা দশরথেন চ ৷

শৃঙ্গিবেরপুরে সূতং গঙ্গাকূলে ব্যসর্জ্জযত্ ৷৷

গুহমাসাদ্য ধর্মাত্মা নিষাদাধিপতিং প্রিযম্ ৷৷ 1.1.27 ৷৷

রামভক্ত্যবিশেষাল্লক্ষ্মণসীতাবত্ পৌরাণামপ্যনুবৃত্তিং দর্শযতি- পৌরৈরিতি ৷ পূরে ভবাঃ পৌরাঃ ৷ অনেন স্ত্রীবালবৃদ্ধাবিশেষ উক্তঃ ৷ দূরমনুগতঃ ইত্যনেন বিরহাসহিষ্ণুত্বোক্ত্যা পৌরাণাং পরমা ভক্তিরুক্তা ৷ "পুনর্বিশ্লেষভীরুত্বং পরমা ভক্তিরুচ্যতে" ইতি বচনাত্ ৷ পৌরৈরিত্যনেন তদ্দেশবাস এব রামভক্তিহেতুরিত্যুক্তম্ ৷ পিত্রা দশরথেন চ ৷ চশব্দো ন্বাচযে ৷ অল্পমনুগত ইত্যর্থঃ ৷ আদ্বারং হি তেনানুগতম্ ৷ পিত্রেত্যনেন পুত্রকৃতবাত্সল্যাদনুগত ইত্যুক্তম্ ৷ এবং পরত্বসৌলভ্যে দর্শিতে ৷ অথ বাত্সল্যসৌশীল্যে দর্শযতি- শৃঙ্গিবেরপুর ইতি ৷ ধর্মৌ আশ্রিতবাত্সল্যসৌশীল্যে আত্মা স্বভাবো যস্য সঃ তথা ৷ আশ্রিতবাত্সল্যসৌশীল্যস্বভাবো রামঃ শৃঙ্গিবেরপুরে শৃঙ্গিণঃ কৃষ্ণসারাদযঃ তেষাং বেরাণি কৃত্রিমশরীরাণি ৷ "প্রতিচ্ছন্দঃ প্রতিনিধির্বেরং চ প্রতিরূপকম্" ইতি বৈজযন্তী ৷ বঞ্চনেন সজাতীযমৃগগ্রহণার্থানি যস্মিন্ তত্ শৃঙ্গিবেরম্ ৷ তথাত্বাত্ তদাখ্যে পুরে গঙ্গাকূলে, শৃঙ্গিবেরপুরসন্নিহিতগঙ্গাতীর ইত্যর্থঃ ৷ এতেন গঙ্গাতীরত্বমাত্রেণ নোদ্দেশ্যত্বম্, কিন্তু ভক্তসেবিতত্বেনেত্যুক্তম্ ৷ "সা কাশীতি ন চাকশীতি- " ইত্যাদ্যভিযুক্তোক্তেঃ ৷ নিষাদাঃ প্রতিলোমজাতিবিশেষাঃ ৷ "নিষাদো মৃগঘাতী স্যাত্" ইতি বৈজযন্তী ৷ তেষামধিপতিরিতি জাত্যপকর্ষ উক্তঃ ৷ প্রীণাতীতি প্রিযঃ তম্, স্বস্মিন্ প্রীতিমন্তমিত্যর্থঃ ৷ গূহতি গোপযতি বঞ্চযতি পরস্বমিতি গুহঃ ৷ ইগুপধলক্ষণঃ কপ্রত্যযঃ ৷ তম্, জাতিতো বৃত্তিতো গুণতঃ কুলতশ্চ হীনমপি স্বস্মিন্নানুকূল্যমাত্রেণাদরণীযত্বমুক্তম্ ৷ নিষাদাধিপতিমাসাদ্যেত্যনেন সৌশীল্যমুক্তম্ ৷ মহতো মন্দৈস্সহ নীরন্ধ্রেণ সংশ্লেষো হি সৌশীল্যম্ ৷ ধর্মাত্মেত্যনেন মহত্ত্বমুক্তম্ ৷ আসাদ্যেত্যত্রাভিবিধিবাচিনা আঙা অর্থান্নৈরন্ধ্র্যমুক্তম্ ৷ শৃঙ্গিবেরপুরে গুহমাসাদ্যেত্যনেন দোষে পি ভোগ্যত্বরূপং বাত্সল্যমুক্তম্ ৷ সূতং সুমন্ত্রম্, পারম্পর্যেণানুবর্ত্তমানমপি ব্যসর্জ্জযত্ ব্যসৃজত্ ৷ স্বার্থে ণিচ্ ৷ সদ্যঃ প্রসূতবত্সবাত্সল্যাত্ পূর্ববত্সং পরিহরন্ত্যা ধেনোরিব বাত্সল্যাতিশয উক্তঃ ৷৷ 1.1.27 ৷৷



গুহেন সহিতো রামো লক্ষ্মণেন চ সীতযা ৷৷ 1.1.28 ৷৷

স্বস্মিন্নাশালেশমাত্রেণ জনিতং গুহবিষযপ্রেমাতিশযং দর্শযতি- গুহেনেতি ৷ রামঃ গুহেন সহিতঃ সন্ লক্ষ্মণেন সীতযা চ সহিতঃ ৷ গুহসন্ধানানন্তরমেব লক্ষ্মণসীতাভ্যাং নিত্যানপাযিভ্যাং সাহিত্যমাসীত্ ৷ ততঃ পূর্বং সিদ্ধমপি সদসত্প্রাযমাসীদিত্যর্থঃ ৷ যদ্বা দৃষ্টান্তার্থং লক্ষ্মণসীতাসাহিত্যকথনম্, তাদৃশসৌহার্দং (স্নেহো ) গুহে প্যাসীদিতি ভাবঃ ৷ সহিতঃ সংহিতঃ ৷ "সমোবাহিতততযোঃ" ইতি মলোপঃ ৷ সঃ রামঃ লক্ষ্মণেন সীতযা চ সহ গুহেন হিতঃ প্রহিতঃ গঙ্গাং তারিত ইত্যপ্যাহুঃ ৷৷ 1.1.28 ৷৷



তে বনেন বনং গত্বা নদীস্তীর্ত্বা বহূদকাঃ ৷

চিত্রকূটমনুপ্রাপ্য ভরদ্বাজস্য শাসনাত্ ৷৷ 1.1.29 ৷৷

তে বনেন ইতি শ্লোকদ্বযমেকান্বযম্ ৷ তে রামাদযস্ত্রয ইত্যনেন গুহনিবর্ত্তনং দ্যোতিতম্ ৷ বনেন বনং গত্বা বনাদ্বনং গত্বা ৷ পঞ্চম্যর্থে তৃতীযা, হেতৌ তৃতীযা বা ৷ অনেন নূতনবনাবলোকনকুতূহলিত্বং নগরপ্রবেশস্য স্বাধিকারবিরুদ্ধত্বং চ দ্যোত্যতে ৷ যদ্বা অবনেন বনং গত্বা অন্যোন্যরক্ষণেন বনং গত্বেত্যর্থঃ ৷ বক্ষ্যতি- "অগ্রতো গচ্ছ সৌমিত্রে সীতা ত্বামনুগচ্ছতু ৷ পৃষ্ঠতো হং গমিষ্যামি ত্বাং চ সীতাং চ পালযন্ ৷ অন্যোন্যস্যেহ নো রক্ষা কর্ত্তব্যা পুরুষর্ষভ ৷৷" ইতি৷ যদ্বা অবনেন পিতৃবচনপরিপালনেন হেতুনা বনং গত্বা, অবনেন লোকরক্ষণেন হেতুনা বা৷ রাবণাদিদুষ্টনিবর্হণমুখেন লোকরক্ষণার্থং হি তেষাং বনগমনম্৷ যদ্বা "তেবৃ দেবনে" ইতি ধাতোর্ভাবে ল্যুট্৷ তেবনেন দেবনেন লীলযা অনাযাসেনেত্যর্থঃ৷ মৃগযাক্রীডনেন বা৷ অনযৈব ব্যুত্পত্ত্যা তেবনং পাদসঞ্চার ইতি লভ্যতে, সূতবিসর্জনানন্তরং রথাদবরুহ্য পাদসঞ্চারেণ বনং গত্বেত্যর্থঃ৷ যদ্বা অবনেন সহ বনং গত্বা মধ্যে মধ্যে স্থলপ্রদেশং বনং চ গত্বেত্যর্থঃ৷ বনেন জলেন সহিতং বনম্, ন তু মরুকান্তারমিতি বার্থঃ৷ "পযঃ কীলালমমৃতং জীবনং ভুবনং বনম্" ইত্যমরঃ৷ বহূদকাঃ বিপুলোদকাঃ অধিকোদকা বা৷ "বিপুলানেকযোর্বহুঃ" ইতি বৈজযন্তী৷ নৌতার্যা ইত্যর্থঃ৷ নদীঃ গঙ্গাম্ তীর্ত্বা উত্তীর্য৷ "গঙ্গা নদীনাম্" ইতি নদীমুখ্যত্বাত্ নিরুপপদনদীশব্দেন গঙ্গোচ্যতে৷ "জাত্যাখ্যাযামেকস্মিন্বহুবচনমন্যতরস্যাম্" ইতি বহুবচনম্, পূজাযাং বহুবচনং বা৷ "অদিতিঃ পাশান্" ইতিবদবযববহুত্বাভিপ্রাযেণ বা বহুবচনম্৷ অত্র 'অগ্নিহোত্রং জুহোতি, যবাগূং পচতি' ইতিবদর্থক্রমেণ নদীস্তীর্ত্বা বনং গত্বেতি যোজনীযম্৷ যদ্বা অপূর্বকালেপি ক্ত্বাপ্রত্যযঃ 'আস্যং ব্যাদায স্বপিতি' ইতিবত্৷ যদ্যপি "আস্যং ব্যাদায স্বপিতি সংমীল্য হসতি ইত্যুপসঙ্খ্যানম্" ইতি বার্ত্তিকে স্থলদ্বযমেবোপাত্তম্ তথাপি ন্যাসকৃতা "পরাবরযোগে চ" ইতি পূর্বসূত্রে চকারাত্ সর্বত্রাযং প্রযোগঃ সম্ভবতীত্যুক্তম্৷ যদ্বা তে বনেনেত্যনেন গঙ্গাতরণমর্থসিদ্ধম্৷ নদীশব্দো যমুনাপরঃ৷ যদ্বা নদীঃ গঙ্গাযমুনামন্দাকিনীঃ৷ মন্দাকিনীনাম চিত্রকূটপরিসরে পরিসরন্তী স্রবন্তী৷ সৌকর্যায যুগপদুক্তম্৷ যদ্বা পূর্বার্দ্ধে স রামো লক্ষ্মণেন সীতযা চ সহ গুহেন হিতঃ প্রহিতঃ, সীতালক্ষ্মণরামাঃ গুহেন গঙ্গাং তারিতা ইত্যর্থঃ৷ অতঃ পাদসঞ্চারেণ বনগমনমত্রোক্তম্৷ ভরদ্বাজস্য শাসনাত্ চিত্রকূটমনুপ্রাপ্য৷ প্রজাভরণশীলো ভরদ্বাজঃ৷ ইত্থং নিরুক্তমৃগারণ্যকে- "এষ এব বিভ্রদ্বাজঃ প্রজা বৈ বাজঃ তা এষ বিভর্ত্তি যদ্বিভর্ত্তি তস্মাত্ ভরদ্বাজ ইত্যাচক্ষতে" ইতি৷ যদ্বা বাজং রেতঃ, বাজকরণমিত্যাদৌ তথা প্রযোগাত্৷ বিভ্রদ্বাজং ভরদ্বাজঃ৷ নিত্যব্রহ্মচারীত্যর্থঃ৷ "ভরদ্বাজো হ ত্রিভিরাযুর্ভির্ব্রহ্মচর্যমুবা(পা)স" ইতি শ্রুতেঃ৷ তস্য শাসনান্নিযমনাত্ চিত্রকূটে ভবদ্ভিঃ স্থাতব্যম্, তস্যাযমেব মার্গ ইত্যেবংরূপাত্৷ অনু সদৃশম্ "পশ্চাত্সাদৃশ্যযোরনু" ইত্যমরঃ৷ রাজকুমারাণাং স্বেষামুচিতমিত্যর্থঃ৷ "সুভগশ্চিত্রকূটোসৌ গিরিরাজোপমো গিরিঃ৷ যস্মিন্ বসতি কাকুত্স্থঃ কুবের ইব নন্দনে ৷৷" ইতি বক্ষ্যতি ৷ পশ্চাদ্ভাগে বা চিত্রাণি আশ্চর্যাবহানি কূটানি শিখরাণি যস্যাসৌ চিত্রকূটঃ তম্ ৷ "আশ্চর্যালেখ্যযোশ্চিত্রম্"

ইত্যমরঃ ৷ প্রাপ্য গত্বা ৷৷ 1.1.29 ৷৷



রম্যমাবসথং কৃত্বা রমমাণা বনে ত্রযঃ ৷

দেবগন্ধর্বসঙ্কাশাস্তত্র তে ন্যবসন্ সুখম্ ৷৷ 1.1.30 ৷৷

রম্যং রমণীযং জলরামণীযকস্থলরামণীযকাদিযুক্তম্ আবসথং পর্ণশালারূপং গৃহম্ ৷ "ধিষ্ণ্যমোকো নিবসনং স্থানাবসথবাস্তু চ" ইত্যমরঃ ৷ কৃত্বা নির্মায ৷ অত্র পর্ণশালানির্মাণে লক্ষ্মণস্য সাক্ষাত্কর্তৃত্বম্ ৷ ইতরযোস্তু উচিতদেশপ্রদর্শনাদিনা প্রযোজককর্তৃত্বম্ ৷ "সমানকর্তৃকযোঃ পূর্বকালে" ইত্যত্র সূত্রে 'গৃহৈকত্ববদুদ্দেশ্যগতত্বেন দ্বিত্বস্যাবিবক্ষিতত্বাদনেকক্রিযাস্বপি ক্ত্বাপ্রত্যযস্সম্ভবতি' ইতি ন্যাসকারোক্তেঃ ক্ত্বাপ্রত্যযবাহুল্যম্ ৷ তত্র বনে চিত্রকূটোপান্তবনে রমমাণাঃ লীলারসমনুভবন্তঃ সন্তঃ সীতারামযোঃ পুষ্পাপচযসলিলক্রীডাদিকং রতিঃ ৷ "বৈদেহি রভসে কচ্চিচ্চিত্রকূটে মযা সহ ৷ পশ্যন্তী বিবিধান্ ভাবান্ মনোবাক্কাযসংযুতান্ ৷" ইতি হি বক্ষ্যতি ৷ লক্ষ্মণস্য তু বিশিষ্টবিষযকৈঙ্কর্যলাভজা প্রীতিঃ ৷ বক্ষ্যতি "ভবাংস্তু সহ বৈদেহ্যা গিরিসানুষু রংস্যতে ৷ অহং সর্বং করিষ্যামি জাগ্রতঃ স্বপতশ্চ তে ৷৷" ইতি৷ ত্রযো রমমাণাঃ ইত্যনেনান্দহেতুভেদেপ্যানন্দাংশে তৌল্যমুচ্যতে "পরমং সাম্যমুপৈতি" "ভোগমাত্রসাম্যলিঙ্গাচ্চ" ইতিবত্৷ রমমাণা ইতি বর্ত্তমাননির্দ্দেশেন নৈরন্তর্য্যমুক্তম্৷ বর্ত্তমানার্থকস্যাপ্যস্য ন্যবসন্নিতি ভূতপ্রত্যযান্তবিশেষণত্বম্৷ "ধাতুসম্বন্ধে প্রত্যযাঃ" ইত্যনুশাসনাত্ অগ্নিষ্টোমযাজী পুত্রস্তে ভবিতা' ইতিবত্ সম্ভবতি৷ অত এব দেবগন্ধর্বসঙ্কাশাঃ সন্তঃ, দেবগন্ধর্বা মনুষ্যগন্ধর্বেভ্যোধিকানন্দাঃ৷ যদ্বা দেবী চ দেবশ্চ দেবৌ লক্ষ্মীনারাযণৌ৷ "পুমান্স্ত্রিযা" ইত্যেকশেষঃ৷ গানং ধারযতীতি গন্ধর্বঃ৷ "এতত্সাম গাযন্নাস্তে" ইত্যুক্তঃ সর্বদা সামগানপরো মুক্তঃ৷ দেবৌ চ গন্ধর্বশ্চ দেবগন্ধর্বাঃ তত্সদৃশাঃ দেবগন্ধর্বসঙ্কাশাঃ৷ নিভাদিত্বাদুত্তরপদভূতা এব সন্তঃ সদৃশবচনাঃ৷ তথাহামরঃ- "স্যুরুত্তরপদে ত্বমী৷ নিভসঙ্কাশনীকাশপ্রতীকাশোপমাদযঃ" ইতি৷ তে ত এব সন্তঃ সাকেতবাসিনঃ এব সন্তঃ সুখং ন্যবসন্৷ বক্ষ্যতি "সুরম্যমাসাদ্য তু চিত্রকূটং নদীং চ তাং মাল্যবতীং সুতীর্থাম্৷ ননন্দ রামো মৃগপক্ষিজুষ্টাং জহৌ চ দুঃখং পুরবিপ্রবাসাত্ ৷৷" ইতি ৷ যদ্বা ত এব সন্তঃ বনবাসিন এব সন্তঃ, নাগরিকা অপি চিরং বনচরা ইবাবসন্নিত্যর্থঃ ৷ মুখগ্লান্যাদিভিস্তেষাং বৈদেশিকত্বগন্ধো পি নাজ্ঞাযতেতি ভাবঃ ৷ সুখং যথা ভবতি তথা ন্যবসন্ ৷ কদাচিদপি দুঃখলেশো পি নান্বভাবীত্যর্থঃ ৷ অত্র ক্রিযাভেদাত্ তচ্ছব্দদ্বযপ্রযোগ ইত্যপ্যাহুঃ ৷ তে তীর্ত্বা জগ্মুরিতি ক্রিযাপদমধ্যাহৃত্য কেচিদ্যোজযন্তি ৷ অত্র দেবগন্ধর্বসঙ্কাশা ইতি পদগতেনোপমালঙ্কারেণ কিঞ্চিদ্বস্তু ধ্বন্যতে- যস্তাবত্স্বরূপজ্ঞানপূর্বকং ভগবত্যনুরক্তো ভবতি তং ভগবান্ দেব্যা সমাগত্য দিব্যং বিমানমারোপ্যাতিবাহিকগণৈঃ সত্কার্য বিরজাং তীর্ত্বা তিল্যকান্তারমাসাদ্যামানবেনানুজ্ঞাপ্য দিব্যলোকে মহামণিমণ্ডপমুপেত্য দিব্যসিংহাসনারূঢঃ শ্রিযা সহ মোদমানস্তদ্রচিতসর্বদেশসর্বকালসর্বাবস্থোচিতসকলবিধকৈঙ্কর্যো স্মৈ স্বানন্দসমমানন্দং দত্ত্বা তেন সহ যাবত্কালমাস্ত ইতি ৷৷ 1.1.30 ৷৷



চিত্রকূটং গতে রামে পুত্রশোকাতুরস্তথা ৷

রাজা দশরথঃ স্বর্গং জগাম বিলপন্ সুতম্ ৷৷ 1.1.31 ৷৷

এবং লক্ষ্মণস্য ভগবচ্ছেষত্ববৃত্তিং প্রতিপাদ্য ভরতস্য পারতন্ত্র্যবৃত্তিং দর্শযতি- মৃতে তু তস্মিন্নিত্যাদিনা ৷ তদুপোদ্ঘাতত্বেনাহ- চিত্রেতি ৷ রামে চিত্রকূটং তথা উক্তপ্রকারেণ গতে সতি দশরথো রাজা পুত্রশোকেন পুত্রাদর্শনজদুঃখেনাতুরঃ পীডিতঃ সন্ সুতমুদ্দিশ্য হা সুতেত্যেবং বিলপন্ প্রলাপং কুর্বন্

স্বর্গং জগাম ৷৷ 1.1.31 ৷৷



মৃতে তু তস্মিন্ ভরতো বসিষ্ঠপ্রমুখৈর্দ্বিজৈঃ ৷

নিযুজ্যমানো রাজ্যায নৈচ্ছদ্রাজ্যং মহাবলঃ ৷৷ 1.1.32 ৷৷

মৃতে ত্বিতি ৷ তস্মিন্ দশরথে মৃতে সতি ৷ স্বর্গপ্রাপ্তিরপি নশ্বরত্বেনানুপাদেযেতি মৃতে ইত্যুক্তম্ ৷ মহাবলঃ রাজ্যভরণসমর্থঃ অত এব ভরতঃ ৷ ভরত ইতি রাজ্যস্য ভরণাদিত্যুক্তরীত্যা ভাবজ্ঞেন বসিষ্ঠেন ভরত ইতি কৃতনামা বসিষ্ঠপ্রমুখৈর্দ্বিজৈঃ বসিষ্ঠাদিভির্ব্রাহ্মণৈঃ ৷ রাজ্যায রাজ্যং কর্তুং নিযুজ্যমানঃ ৷ "ক্রিযার্থোপপদস্য চ কর্মণি স্থানিনঃ "ইতি চতুর্থী ৷ রাজ্যং রাজত্বম্ ৷ "যে চাভাবকর্মণোঃ" ইতি প্রতিষেধাদনো ন প্রকৃতিভাবঃ ৷ নৈচ্ছত্ নাভ্যলষত্ ৷ মহাবল ইত্যনেন সত্যামেব শক্তৌ স্বরূপবিরুদ্ধত্বাদ্রাজ্যং নাঙ্গীচকারেত্যবগম্যতে ৷ অত এব বক্ষ্যতি- "রাজ্যং চাহং চ রামস্য ধর্মং বক্তুমিহার্হসি ৷ বিললাপ সভামধ্যে জগর্হে চ পুরোহিতম্ ৷ কথং দশরথাজ্জাতো ভবেদ্রাজ্যাপহারকঃ ৷৷" ইতি ৷৷ 1.1.32 ৷৷



স জগাম বনং বীরো রামপাদপ্রসাদকঃ ৷৷ 1.1.33 ৷৷

স জগামেত্যর্দ্ধমেকং বাক্যম্ ৷ বীর্যেণ যুক্তো বীরঃ ৷ বীর্যমত্র শত্রুভূতরাগাদিজেতৃত্বম্ ৷ বিষযানাকৃষ্টচিত্ত ইত্যর্থঃ ৷ যদ্বা "এভিশ্চ সচিবৈঃ সার্দ্ধং শিরসা যাচিতো মযা ৷ ভ্রাতুঃ শিষ্যস্য দাসস্য প্রসাদং কর্তুমর্হসি ৷৷" ইত্যুক্তরীত্যা চতুরঙ্গবলসহিতঃ স ভরতঃ রামপাদপ্রসাদকঃ৷ পাদশব্দঃ পূজ্যবাচী৷ "পূজ্যে তু পাদনামাঙ্কঃ" ইত্যমরশেষঃ৷ প্রসাদকঃ৷ "তুমুন্ণ্বুলৌ ক্রিযাযাং ক্রিযার্থাযাম্" ইতি ণ্বুল্৷ পূজ্যং রামং প্রসাদযিতুমিত্যর্থঃ৷ যদ্বা রামচরণযোঃ প্রসাদকঃ, রামস্যৈব প্রসাদ্যত্বেপি পাদযোঃ প্রসাদ্যত্বোক্তিঃ শেষভূতব্যবহারানুসারেণ৷ রাজানং দ্রষ্টুমিতি বক্তব্যে রাজপাদৌ দ্রষ্টুমিতি হি ভৃত্যজনো ব্যবহরতি৷ বনং জগাম প্রাপ, বস্তুতো রামস্য কোপাভাবেপি ভরতায রাজ্যং দত্তমিতি বুদ্ধিং নিবর্তযিতুমিত্যর্থঃ৷ "পূজিতা মামিকা মাতা দত্তং রাজ্যমিদং মম৷ তদ্দদামি পুনস্তুভ্যং যথা ত্বমদদা মম ৷৷" ইত্যুত্তরত্রাপি বক্ষ্যতি ৷৷ 1.1.33 ৷৷



গত্বা তু সুমহাত্মানং রামং সত্যপরাক্রমম্ ৷

অযাচদ্ভ্রাতরং রামমার্যভাবপুরস্কৃতঃ ৷৷ 1.1.34 ৷৷

গত্বা ত্বিতি ৷ অত্র স ইত্যনুষজ্যতে ৷ স আর্যভাবপুরস্কৃতঃ পুরস্কৃতঃ আর্যভাবঃ যেন সঃ ৷ আহিতাগ্ন্যাদিত্বাত্ পরনিপাতঃ ৷ যদ্বা আর্যভাবেন স্বস্যার্যভাবেন পুরস্কৃতঃ পূজিতঃ ৷ উচিতমনেন ক্রিযত ইতি শ্লাঘিত ইত্যর্থঃ ৷ "পূজিতঃ স্যাত্পুরস্কৃতঃ" ইতি বাণঃ ৷ তথাবিধঃ সন্ সুমহান্ আত্মা অন্তঃকরণং যস্য তম্, সুমহাত্মানং স্বতঃ প্রসন্নহৃদযমিত্যর্থঃ ৷ সত্যপরাক্রমং সত্যে পরাক্রমো প্রচ্যুতত্বং যস্য তং রামম্, গত্বা তু প্রাপ্য, তু বিশেষোস্তি ৷ তস্যাগ্রে স্থিতিরেবালম্, যাচনমতিরিচ্যত ইতি ভাবঃ ৷ ভ্রাতরং রামমযাচত্ প্রার্থযামাস, স্বাভীষ্টমিতি শেষঃ ৷ যাচের্দ্বিকর্মকত্বাত্ স্বরিতেত্ত্বাদুভযপদী ৷ ক্রিযা ভেদাদ্রামশব্দস্য ন পুনরুক্ততা ৷৷ 1.1.34 ৷৷



ত্বমেব রাজা ধর্মজ্ঞ ইতি রামং বচো ব্রবীত্ ৷

রামো পি পরমোদারঃ সুমুখঃ সুমহাযশাঃ ৷

ন চৈচ্ছত্পিতুরাদেশাদ্রাজ্যং রামো মহাবলঃ ৷৷ 1.1.35 ৷৷

স্বাভীষ্টমেবাহ- ত্বমেবেতি ৷ ধর্মজ্ঞঃ জ্যেষ্ঠে বিদ্যমানে ন কনিষ্ঠো রাজ্যমর্হতীতি ধর্মং জানন্ ত্বমেব রাজা নান্যঃ ইতি রামং বচো ব্রবীত্ ৷ "অকথিতং চ" ইতি দ্বিকর্মকত্বম্ ৷ ননু ভরতকৃতা প্রপত্তিঃ কুতো নাফলত্, অধিকারিবৈগুণ্যাদ্বা শরণ্যবৈগুণ্যাদ্বা ? নাদ্যঃ অপেক্ষাতিরিক্তস্যাভাবাত্ ৷ নান্ত্যঃ, তস্য সর্বগুণপরিপূর্ণত্বাত্; ইত্যাশঙ্ক্য প্রবলপ্রতিবন্ধকস্য প্রারব্ধস্য সদ্ভাবাত্ ন সা ফলিতেত্যাহ- রামো পীতি ৷ অপিশব্দঃ প্রতিবিশেষণমন্বেতি ৷ রামো পি রমযতীতি ব্যুত্পত্ত্যা স্বরূপরূপগুণৈরাশ্রিতচিত্তরঞ্জনস্বভাবো পি পরমোদারো পি স্বপর্যন্তাপেক্ষিতার্থপ্রদো পি "য আত্মদা বলদা" ইতি শ্রুতেঃ ৷ সুমুখো পি অর্থিজনলাভেন প্রসন্নমুখো পি সুমহাযশাঃ অপি "ন হ্যর্থিনঃ কার্যবশাদুপেতাঃ ককুত্স্থবংশে বিমুখাঃ প্রযান্তি" ইতি শ্রীবিষ্ণুপুরাণোক্তরীত্যা মহাকীর্তিরপি মহাবলো পি আশ্রিতমনোরথপূরণে নিপুণো পি রামঃ পিতুরাদেশাত্ বলবত্প্রতিবন্ধকান্নৈচ্ছত্ ৷ চকারাত্তদবসানে ত্বৈচ্ছদিত্যর্থঃ ৷ আদেশো নিযোগঃ ৷৷ 1.1.35 ৷৷



পাদুকে চাস্য রাজ্যায ন্যাসং দত্ত্বা পুনঃ পুনঃ ৷

নিবর্ত্তযামাস ততো ভরতং ভরতাগ্রজঃ ৷৷ 1.1.36 ৷৷

সর্বথা প্রপত্তের্বৈফল্যমনুচিতমিতি যাবত্প্রতিবন্ধকানিবৃত্তিফলপ্রতিনিধিং দিশতি স্মেত্যাহ- পাদুকে চেতি ৷ চস্ত্বর্থঃ ৷ কিন্তু ভরতাগ্রজঃ ফলপ্রদানোচিতসম্বন্ধশীলঃ রাজ্যায রাজ্যং কর্তুম্ ৷ "ক্রিযার্থোপপদস্য চ কর্মণি স্থানিনঃ" ইতি চতুর্থী ৷ অস্য ভরতস্য পাদুকে ন্যাসং স্বপ্রতিনিধিং দত্ত্বা, রামপাদুকে রাজ্যং কুরুতঃ অহং তযোঃ পরিচারক ইতি ভাবযেতি দত্ত্বেত্যর্থঃ ৷ পুনঃ পুনর্ভরতং তস্মাদ্দেশান্নিবর্ত্তযামাস ৷ পুনঃপুনরিত্যনেন ভরতস্য রামবিরহাসহিষ্ণুত্বং দ্যোত্যতে ৷ স্বার্থত্বনিবৃত্তিপূর্বকপরস্বত্বাপাদনরূপত্বাভাবাত্ ন চতুর্থী, কিন্তু সম্বন্ধসামান্যে ষষ্ঠী ৷৷ 1.1.36 ৷৷



স কামমনবাপ্যৈব রামপাদাবুপস্পৃশন্ ৷

নন্দিগ্রামে করোদ্রাজ্যং রামাগমনকাঙ্ক্ষযা ৷৷ 1.1.37 ৷৷

অথ প্রপন্নস্য যাবত্প্রারব্ধনিবৃত্তিশেষিণিবৃত্তিং দর্শযন্নাহ- স কামমিতি ৷ স ভরতঃ কামং রামকৈঙ্কর্যমনোরথমপ্রাপ্যৈব ৷ রামপাদৌ রামস্য পাদুকে ৷ পাদশব্দঃ পাদুকোপলক্ষকঃ ৷ উপস্পৃশন্ প্রত্যহং সেবমানঃ সন্ রামাগমনকাঙ্ক্ষযা কদা রাম আগমিষ্যতীতি প্রত্যাশযা চতুর্দশবর্ষরূপপ্রতিবন্ধকমুত্তীর্য্য কদা রামকৈঙ্কর্যং লপ্স্য ইতি মনোরথমভিবর্ধযন্নিত্যর্থঃ ৷ রামরহিততন্নিবাসস্যাতিদুঃখাবহতযাযোধ্যাং বিহায নন্দিগ্রামে নন্দিগ্রামাখ্যে অযোধ্যাসন্নিহিতে কুত্রচিত্ গ্রামে রাজ্যমকরোত্ ৷ ত